फेसबुक म टूरी पटइया फर्जी प्रेमी गिरफ्तार, प्रोफाईल म पुलिस के फोटू लगाके टूरी ल करत रहिस ब्लैकमेलिंग

राजनांदगांव, फेसबुक म दोस्ती, प्यार अऊ फेर फ्रॉड के मामला सरलग बाढ़त जात हे। अइसनहे नवा मामला राजनांदगांव ले आए हे। फेसबुक म पुलिस के वर्दी म युवक के फोटो देखके टूरी ह इंप्रेस हो गीस। दोस्ती करिस, बात बढि़स त प्यार हो गे अऊ टूरी ह अपन अश्लील फोटो तक टूरा ल भेज दीस। एखर बाद टूरा ह ब्लैकमेलिंग शुरू कर दीस। टूरी के शिकायत के बाद पुलिस ह आरोपी ल गिरफ्तार करे हे।
जानबा हे के यदु किंग वैभव उर्फ जय के नाम वाले टूरा के वर्दी वाला फोटू ले लेके प्रोफाइल तक सब फर्जी रहिस। पूरा मामला खैरागढ़ थाना क्षेत्र के ये। इहां के रहइया एक झन टूरी ल फेसबुक म करीबन डेढ़ महिना पहिली वो टूरा के फ्रेंड रिक्वेस्ट मिलीस। टूरी ह ह प्रोफाइल चेक करिस त वोमें टूरा के फोटो पुलिस के वर्दी म रहिस। टूरी ओकर उपर भरोसा करके रिक्वेस्ट ल एक्सेप्ट कर लीस। थोकन दिन बाद दुनों के बीच मेसेंजर म गोठ-बात तको शुरू हो गे। दुनों के बीच दोस्ती हो गीस त दूनों एक-दूसर ल अपन मोबाईल नंबर घलोक दे दीन।
ये बीच टूरा ह टूरी मेर बिहाव के प्रस्ताव रखिस। टूरी घलोक ओखर बात म फंस गए रहिस। बात बढ़े लगिस त टूरी ह एक दिन अपन अश्लील फोटो घलोक टूरा के वॉट्सऐप म भेज दीस। एखर बाद टूरा ह टूरी मेर रुपिया के मांग करे लागिस। नइ देहे म वो फोटो ल वायरल करे के धमकी देहे लागिस। टूरी डेरा गे अऊ अपन घर म ये बात ल बता के पुलिस म शिकायत करिस। पुलिस ह साइबर सेल के मदद ले आरोपी ल तिल्दा के हथबंद कला ले गिरफ्तार कर लीस।