डाटा एंट्री के परीक्षा म फर्जी एडमिट कार्ड बनवईया पकड़ाईस

रायपुर, छत्तीसगढ़ व्यावसायिक परीक्षा मंडल ह इतवार के डाटा एंट्री ऑपरेटर के परीक्षा आयोजित करे रहिस। ये परीक्षा म प्रदेश के हजारों अभ्यर्थी सामिल होए रहिन। ये परीक्षा म दू अइसे अभ्यर्थी घलोक परीक्षा देहे रहिन, जेन फर्जी एडमिट कार्ड लेके परीक्षा केंद्र पहुंचे रहिन। दुनों अभ्यर्थि अऊ परीक्षा केंद्र अधिकारी के खिलाफ मामला दर्ज करे गए हे।
मिले जानकारी के मुताबिक ये मामला तेलीबांधा थाना क्षेत्र के हे, जिहां राजधानी रायपुर के एक परीक्षा केंद्र म दू फर्जी अभ्यर्थी परीक्षा देवत पकड़ाए हें। जानबा हे कि खुज्जी के अभ्यर्थी ल चॉइस सेंटर संचालक ह फर्जी एडमिट कार्ड देहे रहिस, संचालक ह दूसर अभ्यर्थी के एडमिट कार्ड एडिट करके प्रवेश पत्र दे रहिस। मामला म पुलिस ह आरोपी निलेश देवांगन ल गिरफ्तार करे हे।