रायपुर म फर्जी होम लोन के चलत रहिस गोरखधंधा, 9 पकड़ाईन

रायपुर, 19 मार्च 2020। राजधानी रायपुर म फर्जी कागद मन के आधार म लोन लेहे के 25 मामला सामने आए हे, जेमां करीबन 10 करोड़ रुपिया के ठगी करे गए हे। खबर हे के आरोपी बहुतेच शातिर तरीका ले ये पूरा वारदात ल अंजाम देवत रहिस। ये मामला म पुलिस ह 9 आरोपी मन के गिरफ्तारी करे हे।

जानबा हे के घटना के मास्टर माइंड टी सुशील राव अऊ सुनील सोनी खमतराई के रहइया हे, जेमन बीते तीन बछर ले फर्जी लोन लेहे-देहे वाला काम करत रहिस। टी सुशील राव ह फर्जी कागद, फर्जी पहिचान पत्र, फर्जी रेलवे पे-स्लिप अऊ फर्जी आईडी कार्ड बनाए के काम करत रहिस, उहें सुनील सोनी बैंक ले लोन लेहे के काम करत रहिस। ये मामला म रेलवे कर्मचारी टी श्रीधर के घलोक मिले हे, जऊन फर्जी लोन बर रेलवेकर्मी मन के कागद मन के जुगाड़ करत रहिस।

जानबा हे के एमन जउन खेल खेलत रहिन तेमा एके मनखे अलग-अलग बैंक ले अलग-अलग नांव ले लोन लेत रहिस। कागद म नाम कोनो अऊ फोटो कोनो दूसर मनखे के रहत रहिस, संगेच फर्जी रजिस्ट्री पेपर लगाके बैंक लोन पास करत रहिन। इमन जादातर रेलवे कर्मचारी के नाव ले ही फर्जी लोन लेत रहिन। जउन रेलवे कर्मचारी के नाम ले एमन लोन लेवत रहिन तेला भनके नइ हावत रहिस के वोकर नाव ले बैंक ले लोन लेहे गए हे।

जब पुलिस ह मामला के पता चलिस त जांच बर एसएसपी आरिफ एच शेख अऊ एएसपी अपराध पंकज चन्द्रा, सीएसपी उरला अभिषेक माहेश्वरी के सियानी म डीएसपी कल्पना वर्मा, थाना प्रभारी सिविल लाइन, आजाद चौक, देवेन्द्र नगर अउ खम्हारडीह के विशेष टीम गठन करके जांच चालू करे गीस। जांच म मिले सबूत मन के आधार म 9 आरोपी मन के गिरफ्तारी कर लेहे गए हे, जिंकर नाव दोषपति श्रीधर, रमन्ना नाडूपुडू, सुनील सोनी, प्रणय सखारे, रामकरण बाघमारे, इमरान खान, इंदुपति श्रीधर, कृष्णा शंकर मिश्रा, सुशील राव हे ते मनल गिरफ्तार करके ऊंखर कब्जा ले 2 लाख 76 हजार 500 रुपए जब्त करे गए हे। फिलहाल लोन पास करइया बैंक के कर्मचारी मन के भूमिका के विस्तृत जांच करे जात हे। जांच म बैंक कर्मी मन के भूमिका संदिग्ध पाए जाय म ऊंखर खिलाफ घलोक कार्रवाई करे जाही। वैल्यूवर अउर सर्च रिपोट तियार करइया मनखे के भूमिका के जांच घलोक करे जात हे।