मुख्यमंत्री श्री विष्णुदेव साय ह श्री फलेश्वरनाथ महादेव मंदिर म पूजा अर्चना करके प्रदेशवासी मन के सुख समृद्धि अऊ खुशहाली के कामना करिन

भगवान भोले के कृपा बने रहय अऊ हमर देश अऊ छत्तीसगढ़ निरंतर विकास, शांति अऊ समृद्धि कोति बढ़त रहे: मुख्यमंत्री
रायपुर, सावन मास के पावन बेरा म मुख्यमंत्री श्री विष्णुदेव साय ह अपन धर्मपत्नी श्रीमती कौशल्या साय के संग आज बगिया स्थित श्री फलेश्वरनाथ महादेव मंदिर पहुंचके पूरा विधि-विधान ले पूजा-अर्चना करके प्रदेशवासी मन के सुख-समृद्धि अउ खुशहाली के मंगल कामना करिन। ए बेरा म मुख्यमंत्री ह सुप्रसिद्ध कथा वाचिका किशोरी राजकुमारी तिवारी द्वारा करे जात शिव महापुराण कथा के श्रवण घलो करिन।
ए बेरा म मुख्यमंत्री ह कहिन के भगवान भोलेनाथ के कृपा सबो के ऊपर रहय अऊ हमर देश अऊ छत्तीसगढ़ ह सरलग विकास, शांति अऊ समृद्धि के दिसा म आघू बढ़य। उमन कहिन के भगवान श्री भोलेनाथ के आशीर्वाद ले छत्तीसगढ़ सरकार राज्य के कल्याण बर समर्पित होके काम करत हे। हमर सरकार के नवा उद्योग नीति ले प्रेरित होके पाछू छै ले आठ महीना म लगभग साढ़े छह लाख करोड़ रूपिया के निवेश प्रस्ताव मिले हे। राज्य सरकार ह युवा मन बर सरकारी नौकरी के अवसर सृजित करे हे।
ए बेरा म फलेश्वरनाथ महादेव मंदिर परिसर म आयोजित 01 लाख 108 पार्थिव शिवलिंग निर्माण अऊ विशेष पूजन अनुष्ठान श्रद्धा, आस्था अऊ शास्त्रोक्त विधि-विधान के संग संपन्न होइस। ए आयोजन 22 जुलाई ले शुरू होए रहिस अऊ एकर समापन आज 24 जुलाई के दिन विधिपूर्वक करे गीस। पूरा आयोजन म भारी संख्या म श्रद्धालु मन उत्साहपूर्वक भाग लेवत हें। भक्तगण पूरा श्रद्धा, निष्ठा अऊ भक्ति भाव ले पार्थिव शिवलिंग निर्माण म सहभागी रहिन। पूजन अउ अनुष्ठान के आयोजन प्रतिष्ठित विद्वान पंडित मन ह शास्त्र सहमत विधि के मुताबिक करिन, जेखर से वातावरण भक्ति अऊ आध्यात्मिक ऊर्जा ले भरपूर रहिस।