जन्म प्रमाण-पत्र बने ले परिवार म आईस खुसी
कोरिया, 31 अगस्त 2024। पाछू एक बछर ले अपन लइका मन के जन्म प्रमाण-पत्र बनाए बर पोड़ी (बचरा) तहसील के अंतर्गत अवइया गांव गोविंदपुर के विशेष पिछड़ी बैगा जनजाति के परिवार ल मुश्किल के सामना करना परत रहिस फेर प्रदेश के मुखिया श्री विष्णुदेव साय के सुशासन वाले सरकार के मन मुताबिक जिला के कलेक्टर श्रीमती चन्दन त्रिपाठी के विशेष पहल ले ए परिवार मन ल ए परेशानी ले छुटकारा मिल गए हे।
पोड़ी (बचरा) तहसीलदार श्री ओपी सिंह ह जानकारी दीस के ग्राम गोविंदपुर निवासी श्री अशोक कुमार के पुत्री नीरज कुमारी, श्री दुलार साय के बेटी कुमारी संगीता अउ कविता, श्री बृजलाल के बिटिया सगुन, बुधियारो, श्री जगसाय के बेटी रीना अउ शंकर लाल बैगा के पुत्र प्रशंसा कुमार के जन्म प्रमाणपत्र तुरंत बनाके देहे गीस। अइसनहे जिला कलेक्टरेट कार्यालय म लगइया जन चौपाल कार्यक्रम म बैकुंठपुर विकासखंड के ग्राम आमगांव निवासी श्रीमती चंदा बाई ह अपन बेटा लक्ष्मण यादव के जन्म प्रमाण पत्र बने म आवत परेशानी के बारे म कलेक्टर श्रीमती त्रिपाठी ल बताइस। आवेदन ल पढ़तेच तुरंत जन्म प्रमाणपत्र बनाए के निर्देश सम्बंधित अधिकारी ल उमन दीन अऊ उही दिन बैकुंठपुर के तहसीलदार श्रीमती डॉ. अमृता सिंह ह जन्म प्रमाण-पत्र बनाए के आदेश जारी करिस अऊ अब लक्ष्मण यादव के जन्म प्रमाण-पत्र बन गे। जन्म प्रमाण पत्र बने ले बैगा परिवार म खुशियां देखे ल घलोक मिलीस।