रायपुर, 31 अगस्त 2024। राज्यपाल श्री रमेन डेका अपन महासमुंद प्रवास के बेरा म काली पुरातत्व अऊ ऐतिहासिक नगरी सिरपुर म प्रसिद्ध अऊ प्राचीन लक्ष्मण मंदिर के अवलोकन करिन। राज्यपाल मंदिर के भव्यता अऊ निर्माण शैली ल देखके मंत्रमुग्ध होइन। जानबा हे कि ये मंदिर केंद्रीय पुरातत्व विभाग कोति ले संरक्षित स्मारक हे, जेखर निर्माण 6 वीं शताब्दी म करे गए रहिस। ए मंदिर के विशेषता हे कि ये लाल ईंटा ले बने हे। एखर अलावा राज्यपाल ह तिवरदेव विहार अऊ सुरंग टीला के घलोक अवलोकन करिन। अवलोकन के समय पुरातत्व विभाग के अधिकारी मन ह मंदिर मन के इतिहास अऊ निर्माण शैली के विस्तार ले जानकारी दीन। राज्यपाल ह ए अवसर म विजिटिंग रजिस्टर म मंदिर मन के रख रखाव के सराहना करिन अऊ इनकर सौंदर्यीकरण म विशेष ध्यान देहे के सुझाव घलोक दीन।
राज्यपाल श्री डेका ह ऐतिहासिक अउ पुरातात्विक नगरी सिरपुर के लक्ष्मण मंदिर परिसर म ’एक पेड़ मां के नाम’ अभियान के तहत देशी आम के पौधा के रोपण तको करिन। ए बेरा म महासमुंद जिला प्रशासन के अधिकारी अउ वन अउ पुरातत्व विभाग के अधिकारी उपस्थित रहिन।