मनेन्द्रगढ़-चिरमिरी-भरतपुर, छत्तीसगढ़ म खरीफ विपणन बछर 2025-26 किसान मन बर सिरिफ धान बेचे के समय नइये, बल्कि ये भरोसा, मान-सम्मान अउ सुरक्षित भविष्य के मजबूत नेंव बनके आगू आय हे। राज्य सरकार कोति ले लागू करे गे पारदर्शी, तकनीक ले लैस अउ किसान-हितैषी धान खरीदी बेवस्था ह कइ बछर ले किसान मन के मन म जमे चिंता अउ दुविधा ल दूर कर देहे हे। अब किसान पूरा भरोसा के संग अपन फसल ल उपार्जन केंद्र तक लावत हें, काबर के उनला ये भरोसा हे के उंखर मेहनत के पूरा दाम बेरा म सीधा उंखर बैंक खाता म पहुंच जाही।
खेती ले अटूट रिस्ता अउ भरोसा के नवा शुरुआत
इही बदले विश्वास के जियत-जागत मिसाल हरे मनेन्द्रगढ़-चिरमिरी-भरतपुर जिला के गांव बरमपुर के रहवइया किसान दुर्गाप्रसाद (पिता कंचनराम)।कइ बछर ले खेती-किसानी ले जुड़े दुर्गाप्रसाद ह मौसम के मार, बाढ़त लागत अउ बाजार के चिंता के बीच घलोक खेती ले अपन नाता कभु कमजोर नइ होवन दीस। ए बछर प्रति एकड़ 21 क्विंटल तक धान खरीदी के नीति अउ 3100 रुपिया प्रति क्विंटल समर्थन मूल्य ह ओखर मन म स्थिरता अउ सुरक्षा के नवा ताकत भर दीस। ये सिरिफ आर्थिक फायदा नइ रिहिस, बल्कि ओ भरोसा के प्रतीक रिहिस, जेमा किसान ह ये महसूस करिस के सरकार ओखर मेहनत ल समझथे अउ ओखर संग मजबूती ले खड़े हे।
खड़गवां उपार्जन केंद्र म बदलिस बेवस्था के झलक
‘तुंहर टोकन 24×7’ बेवस्था के तहत तय तारिख म टोकन लेके जब दुर्गाप्रसाद खड़गवां उपार्जन केंद्र पहुंचिस, त ओला धान खरीदी के पूरा तस्वीर बदले हुए दिखिस। बने बेवस्था वाला परिसर, बइठे बर सही जगा, साफ पिये के पानी अउ कर्मचारी मन के सहयोग वाला बेवहार ये बताथे के अब धान खरीदी प्रक्रिया म किसान के सुविधा अउ सम्मान ल सबले ऊपर रखे जात हे। न भीड़, न हबड़-दबड़ अउ न ही फोकट के अगोरा, जेखर से पूरा काम बड़ असानी ले, बिना कोनो बाधा के अउ संतोषजनक ढंग ले पूरा होइस।
धान खरीदी के समय डिजिटल कांटा-बाट, फोटो आधारित सत्यापन अउ रियल टाइम डेटा एंट्री जइसे आधुनिक तकनीक ह पूरा बेवस्था ल अउ जादा पारदर्शी अउ भरोसेमंद बना देहे हे। हर एक चरण किसान के मौजूदगी म पूरा होइस, जेखर से कोनो भी किसम के शंका या भ्रम के गुंजाइश नइ रिहिस। तकनीक के सही उपयोग से न केवल समय बांचिस, बल्कि बेवस्था के प्रति किसान मन के विश्वास अउ गहरा होइस।
बेरा म भुगतान ले आत्मविश्वास के नवा उड़ान
खरीफ विपणन बछर 2025-26 म किसान दुर्गाप्रसाद ह कुल 20.80 क्विंटल धान के सफलतापूर्वक बिक्री करिस। पूरा खरीदी प्रक्रिया समय सीमा म अउ सही तरीका ले होइस। जब ओखर मेहनत के फसल सम्मानजनक अउ पारदर्शी तरीका ले बेंचाइस अउ भुगतान के राशि सीधा ओखर बैंक खाता म समय पे जमा होइस, त ओखर चेहरा म संतोष अउ गर्व साफ झलकत रिहिस। बेरा म भुगतान मिले ले अब वो लइका मन के पढ़ाई-लिखाई, घर-परिवार के जरूरत अउ अवइया सीजन के खेती के तैयारी ल लेके पहली ले जादा आत्मविश्वास के संग आगू के योजना बना पावत हे। मुख्यमंत्री श्री विष्णुदेव साय के अगुवाई म लागू करे गे किसान हितैषी नीति बर संतोष जतावत दुर्गाप्रसाद कहिथे के, बदले धान खरीदी बेवस्था ह किसान मन के मनोबल ल नवा ऊंचाई देहे हे। अब खेती सिरिफ संघर्ष के निशानी नइये, बल्कि ये एक सुरक्षित, सम्मानजनक अउ स्थायी आजीविका के भरोसेमंद जरिया बनत जावत हे। किसान दुर्गाप्रसाद के ये सफलता के कहानी छत्तीसगढ़ के ओ हजारों किसान मन के भावना ल देखाथे, जेन ह नवा धान खरीदी बेवस्था ले लाभ उठाके आत्मनिर्भरता कोति आत्मविश्वास के संग कदम बढ़ावत हें।
