- किसान मन ल फसल बीमा संबंधी शिकायत के निदान म मिलही मदद
- किसान शिकायत निवारण पोर्टल (एफजीआर) म ऑनलाईन दर्ज होही शिकायत
- शिकायत मन बर कार्यालय मन के चक्कर लगाय अऊ आवेदन देहे के जरूरत नइ हे
- टोल-फ्री नम्बर 14447 म कॉल करके दर्ज करा सकत हे किसान अपन शिकायत
रायपुर, भारत सरकार कोति ले प्रधानमंत्री फसल बीमा योजना अउ मौसम आधारित फसल बीमा के संबंध म किसान मन के शिकायत मन के ऑनलाईन सुनवाई अऊ निदान बर तियार करे गए किसान शिकायत निवारण पोर्टल (एफ.जी.आर.) पॉयलट प्रोजेक्ट के रूप म आज 21 जुलाई ले छत्तीसगढ़ राज्य म लांच करे गीस। शिकायत मन के निदान म ये पोर्टल के उपयोगिता अऊ मूल्यांकन के बाद ये देश के सबो राज्य मन म लागू करे जाही। ये पोर्टल के शुरू होए ले अब किसान मन ल फसल बीमा संबंधी शिकायत मन के निराकरण बर कोनो कार्यालय अऊ अधिकारी के चक्कर काटे के जरूरत नइ परय, न ही लिखित म आवेदन देना होही। किसान भाई टोल-फ्री नम्बर 14447 म कॉल कर अपन शिकायत दर्ज करा सकत हे, जेखर निदान तत्परता ले करे जाही। किसान अपन शिकायत मन के निदान के जानकारी घलोक पोर्टल ले ले पाहीं।
जानबा हे कि प्रधानमंत्री फसल बीमा योजना, भारत सरकार के संयुक्त सचिव अऊ मुख्य कार्यपालन अधिकारी श्री रितेश चौहान, मुख्य कार्यपालन अधिकारी सी.एस.सी. डॉ. दिनेश कुमार त्यागी ह आज वीडियो कॉन्फ्रेंसिंग के माध्यम ले एफजीआर पोर्टल के बीटा वर्जन के छत्तीसगढ़ म शुभारंभ करत कहिन कि देश म सबले पहिली छत्तीसगढ़ राज्य म एला पॉयलट प्रोजेक्ट के रूप म लांच करे जात हे। छत्तीसगढ़ राज्य ल ये पोर्टल के पॉयलट प्रोजेक्ट के रूप म चयन राज्य म प्रधानमंत्री फसल बीमा योजना के क्रियान्वयन म उल्लेखनीय उपलब्धि मन ल देखत करे गए हे। छत्तीसगढ़ राज्य फसल बीमा के क्रियान्वयन म देश के अग्रणी राज्य मन म ले एक हे। छत्तीसगढ़ देश के पहला राज्य हे, जेन ह अपन किसान मन ल रबी सीजन 2022 के फसल बीमा दावा राशि के भुगतान देश म सबसे पहिली करे हे।
एफजीआर पोर्टल के शुभारंभ कार्यक्रम म कृषि उत्पादन आयुक्त छत्तीसगढ़ डॉ. कमलप्रीत सिंह, संचालक कृषि श्री यशवंत कुमार, संयुक्त सचिव श्री के.से. पैकरा, अपर संचालक अभियांत्रिकी श्री जी.के. पिड़िहा, अपर संचालक उद्यानिकी श्री भूपेन्द्र कुमार पांडेय, संयुक्त संचालक कृषि श्री बी.के. मिश्रा अऊ जिला स्तर के अधिकारी अऊ बीमा कंपनी के प्रतिनिधि घलोक वीडियो कॉन्फ्रेंसिंग के माध्यम ले सामिल होइन।
किसान शिकायत निवारण (एफजीआर) पोर्टल म फसल बीमा ले संबंधित शिकायत दर्ज कराए बर किसान ल 14447 टोल-फ्री नंबर म कॉल करना होही। कॉल करे के बाद किससान ले शिकायत संबंधित जानकारी कॉल सेन्टर ह लेही। एखर बाद शिकायत के विवरण संबंधित बीमा कंपनी ल प्रेषित करके निरधारित समय-सीमा म निराकरण करे बर निर्देशित करे जाही।
किसान शिकायत निवारण पोर्टल के संचालन होए के किसान मन ल अब फसल बीमा संबंधी शिकायत मन बर न तो कार्यालय अऊ अधिकारी मन के चक्कर लगाय परय न ही लिखित म आवेदन देहे के जरूरत होही। उमन टोल-फ्री नम्बर 14447 म कॉल करके अपन शिकायत दर्ज करा सकहीं। शिकायत दर्ज कराए के बाद किसान के मोबाईल नंबर म शिकायत दर्ज कराए के संदेश, शिकायत नंबर संग आही, जेखर माध्यम ले शिकायत पोर्टल म शिकायत के सही स्थिति के पता ऑनलाईन लगाए जा सकत हे।
इहां ये बताना जरूरी हे कि फसल बीमा दावा राशि के भुगतान करे म छत्तीसगढ़ देश म अव्वल रहे हे। साल 2021-22 म 05 लाख 66 हजार किसान भाई मन ल 1063 करोड़ रुपिया के बीमा दावा राशि के भुगतान करे गए रहिस। कृषि विभाग ह राज्य के किसान भाई मन ले प्रधानमंत्री फसल बीमा योजना अऊ मौसम आधारित उद्यानिकी फसल बीमा योजना के लाभ उठाए बर बीमा कराए के अपील करे हें। प्रधानमंत्री फसल बीमा कराए के आखरी तारीक 31 जुलाई 2022 हे। किसान भाई फसल बीमा ले संबंधित शिकायत सीधा 14447 टोल फ्री नंबर म कॉल करके दर्ज करा सकत हें।
