सुकमा, 23 जुलाई 2020। राज्य सरकार के महत्वकांक्षी नरवा, गरूवा, घुरूवा अऊ बाड़ी योजना के तहत सुकमा जिला के किसान अपन बाड़ी मन म साग-भाजी उबजा के आत्मनिर्भर होवत हें। जिला ल अब जगदलपुर अऊ मलकानगिरी के साग-भाजी उपर निर्भर नइ रहे ल परत हे। जिला के किसान ये मानसून सीजन म धान अऊ मक्का के बोआई अऊ रोपाई पूरा करे के बाद अब अपन बाड़ी मन म साग-भाजी के खेती के तैयारी म लग गे हे।
जानबा हे के राज्य शासन ह ग्रामीण अर्थव्यवस्था ल मजबूत करे बर लघु अऊ सीमांत किसान मन ल साग-भाजी के खेती बर प्रोत्साहित करे नरवा, गरूवा, घुरूवा अऊ बाड़ी योजना संचालित केरत हे। योजना ले किसान मन के काफी उत्साह बाढ़त हे। अब किसान अपन बाड़ी मन म राज्य शासन के योजना के लाभ उठात जादा मात्रा म सब्जी-भाजी अउ आन फसल घलोक लेहे लगे हें। उद्यानिकी विभाग के अधिकारी मन ह आज इहां बताइन के सर्दी अऊ गर्मि के बेरा म सुकमा जिला म साग-भाजी के बम्पर पैदावार ले किसान मन के उछाह बाढ़े हे। पाछू रबी सीजन म विभाग के सहायता ले एक हजार 674 किसान मन ह अपन बाड़ी म साग-भाजी के उत्पादन करे रहिन। संगेच एक हजार 237 नवा बाड़ी घलोक तियार करे गए रहिस। बाड़ी कार्यक्रम के तहत शासन के योजना मन ले ए लघु किसान मन ल सब्जी बीज, खाद व मजदूरी के राशि घलोक उपलब्ध कराए गए रहिस। एमां 6 हजार 696 क्विंटल साग-भाजी के उत्पादन होए रहिस। एखर से ए लघु किसान मन ल घरेलू उपयोग बर घर के बाड़ी म ही पौष्टिक अऊ स्वादिष्ट साग-भाजी मिलत हे। उहें ओ मन अपन बाड़ी के साग-भाजी ल आस-पास के हाट-बाजार म बेचके बनेच आमदनी हासिल करत हे। गांव म ताजा साग-भाजी के उत्पादन के सेती जिला के कस्बा मन म रहइया मनखे मन ल घलोक लॉकडाउन के समय अड़बड़ राहत मिलीस, जऊन ज्यादातर जगदलपुर अऊ मलकानगिरी ले अवइया साग-भाजी उपर निर्भर रहत रहिन।
बाड़ी कार्यक्रम के सफलता ले उत्साहित उद्यानिकी विभाग के अधिकारी मन ह ये पइत एक हजार 810 अऊ आन किसान मन के बाड़ी म साग-भाजी लगाय के लक्ष्य रखे हे। अब तक एक हजार 880 किसान मन ह ये योजना के लाभ लेहे बर पंजीयन करवावत हें।
