मुख्यमंत्री श्री विष्णु देव साय ह सूरजपुर जिला म 211 करोड़ ले जादा के विकास काम मन के करिन लोकार्पण-भूमिपूजन

किसान मेला सह जैविक मेला के करिन शुभारम्भ, कई ठन शासकीय योजना मन के तहत हितग्राही मन ल करिन लाभान्वित
सूरजपुर, मुख्यमंत्री श्री विष्णु देव साय ह सूरजपुर जिला के तिलसिवां म आयोजित छत्तीसगढ़ रजत महोत्सव कार्यक्रम के वर्चुअल रूप ले शुभारंभ करिन अऊ 211 करोड़ ले जादा के विकास काम मन के लोकार्पण अऊ जमीन पूजन करिन। ए बेरा म उमन सूरजपुर के नवा बस स्टैंड स्थित अटल परिसर म भारत रत्न स्वर्गीय श्री अटल बिहारी वाजपेयी के आदमकद प्रतिमा के अनावरण करिन अऊ किसान मेला सह जैविक मेला के वर्चुअली शुभारंभ करिन।
मुख्यमंत्री श्री साय ह सभा ल संबोधित करत कहिन के छत्तीसगढ़ राज्य स्थापना के 25 साल पूरा होए के अवसर म हम सबो रजत जयंती साल मनावत हन। ये अवसर छत्तीसगढ़ के गौरवशाली यात्रा के चिनहारी ये। बीते 25 बछर म राज्य ह विकास के बहुत अकन आयाम मन ल छुए हे अऊ अब हमला नवा संकल्प के संग आगू बढ़ना हे। उमन सबो नागरिक मन ले एकजुट होके प्रदेश ल प्रगति के नवा ऊँचाइ तक पहुँचाए के आह्वान करिन।
मुख्यमंत्री श्री साय ह स्व. अटल बिहारी वाजपेयी ल सुरता करत कहिन के छत्तीसगढ़ राज्य के बनइया अटल जी ल मैं नमन कात हंव। उमन छत्तीसगढ़ राज्य के निर्माण करके इहां के मनखे मन ल नवा पहिचान दीन। ओ मन देश अऊ प्रदेश के युवा मन बर हमेशा प्रेरणा स्रोत रइहीं। मुख्यमंत्री ह वाजपेयी जी के राजनीतिक जीवन, काव्य प्रतिभा अऊ राष्ट्रहित म करे गे काम मन के घलोक उमन सुरता करिन।
मुख्यमंत्री श्री साय ह राज्य सरकार के उपलब्धि मन के उल्लेख करत कहिन के पाछू 20 महीना म मोदी के गारंटी के तहत बहुत अकन जनकल्याणकारी कदम उठाए गए हे। एमां धान के खरीदी 3100 रूपिया प्रति क्विंटल के दर ले, 70 लाख महिला मन ल महतारी वंदन योजना के अंतर्गत हर महीना 1000 रूपिया के सहायता, तेंदूपत्ता संग्राहक मन ल फेर से चरण पादुका, किसान मन ल धान बोनस, 5 लाख 62 हजार भूमिहीन कृषि मजदूर मन ल 10 हजार रूपिया के आर्थिक मदद, श्रद्धालु मन बर रामलला दर्शन योजना, सियान मन बर 19 तीर्थ स्थल के यात्रा अऊ अटल डिजिटल सेवा केंद्र मन के स्थापना सामिल हे।
मुख्यमंत्री श्री साय ह नक्सल उन्मूलन उपर बोलत कहिन के देश के गृहमंत्री श्री अमित शाह के मार्गदर्शन म प्रदेश ले नक्सलवाद खतम करे के प्रयास तेज गति ले चलत हे अऊ मार्च 2026 तक बस्तर ले नक्सलवाद पूरा खतम करे के लक्ष्य हे। उमन बताइन के कुख्यात नक्सली बसवराजू के सफाया हो गए हे अऊ बड़ संख्या म सुरक्षा कैंप स्थापित करे गए हे।
कार्यक्रम म पाठ्यपुस्तक निगम के अध्यक्ष श्री राजा पाण्डेय, जिला पंचायत अध्यक्ष श्रीमती चन्द्रमणी पैकरा, श्रीमती रेखा राजवाड़े, श्री लवकेश पैकरा, सूरजपुर जिला के रेडक्रॉस सोसाइटी अध्यक्ष श्री बाबूलाल अग्रवाल संग आन जनप्रतिनिधिगण उपस्थित रहिन।