छत्तीसगढ़ म धान खरीदी 1 नवम्बर ले शुरू करे के मांग ल लेके किसान मन ह करिन प्रदर्शन

दुर्ग, 10 अक्टूबर 2020। केन्द्र सरकार ह राज्य ले 60 लाख मिट्रीक टन चावल ले के सहमति दे देहे हे, जोन ह पीछू साल ले 16.5 लाख मैट्रीक टन जादा हे। एखर बर राज्य सरकार ल 25 लाख मैट्रीक टन अतिरिक्त धान खरीदे के रस्ता खुल गे हे। ये बात के मद्देनजर छत्तीसगढ़ प्रगतिशील किसान संगठन के बैनरे तले जिला के किसान मन ह प्रर्दशन करिन अउ राज्य सरकार ले प्रति एकड़ 20 क्विंटल धान खरीदे के आग्रह करिन। किसान नेता झाबेंद्र वैष्णव ह बतइस कि धान खरीदी 1 नवंम्बर ले शुरू करे के मांग करे गे हे। समर्थन मूल्य म रबी फसल चना‌ गेहूं के सरकारी खरीद नई होय के सेती उचित मूल्य नई मिल पावत हे अउ औने पौने दाम म अपन फसल बेचना पड़त हे। अत:चना, गेहूं के सरकारी खरीदी शुरु करे जाए। एला राज्य सरकार ह चुनाव के बेरा अपन घोषणापत्र म शामिल करे रिहिस। प्रदर्शन म दुर्ग के अलावा बालोद जिला के किसान घलो शामिल होइस। किसान गांधी प्रतिमा के पास इकट्ठा होइस अउ हाथ म मांग ले संबंधित तख्ती अउ झंडा ले के नारा लगात हुए रैली के रूप म जिला कार्यालय पहुंचिस। इहां किसान मन ल गेट म ही रोक देहे गिस, जिहां किसान मन ह मुख्यमंत्री के नाम मांगपत्र डिप्टी कलेक्टर ल सौंपिस। प्रदर्शन म राजकुमार गुप्ता,आईके वर्मा, झबेंद्र भूषण वैष्णव, पुरूषोत्तम बाघेला, उत्तम चंद्राकर, परमानंद यादव, बाबूलाल साहू, बंशी देवांगन, बद्रीप्रसाद पारकर, मेघराज मढ़रिया, संतु पटेल, शंकर राव, योगेश्वर दिल्लीवार, प्रमोद पवांर, कल्याण सिंह ठाकुर, वेदनाथ हिरवानी, विष्णु साहू, चंद्रहास अग्रवाल, टेकराम देशमुख, माधो साहू, दीपक यादव, रूठूराम नेताम, एम एल पटेल, हरनारायण पटेल, हर प्रसाद आडिल, बालोद के जीवनंदन पिपरिया सहित सैकडों किसान मन शामिल रिहिस।