रायपुर, 27 अक्टूबर 2020। दक्षिण पूर्व मध्य रेलवे के डाहर ले 28 अक्टूबर के नागपुर मंडल के छिंदवाड़ा स्टेशन ले हावड़ा स्टेशन तक 18 कोच के संयोजन के संग किसान स्पेशल ट्रेन चलाय के निर्णय लेहे गेहे। जेमा महाराष्ट्र, छत्तीसगढ़, बिहार अउ पश्चिम बंगाल राज्य मन ह जुड़ही। वापसी म ये गाड़ी 29 अक्टूबर के हावड़ा स्टेशन ले छिंदवाड़ा स्टेशन बर रवाना होही। किसान के हित म चलाय जावत ये किसान रेल म सब्जी अउ फल के परिवहन के भाड़ा म 50 फीसदी के रियायत देहे जावत हे। ये संबंध म किसान मन अउ व्यापारी मन ल विस्तृत जानकारी देहे जावत हे। संग ही किसान रेल के माध्यम ले सब्जी अउ फल के परिवहन बर प्रेरित करे जावत हे। ये सुविधा ले किसान कम लागत म अपन उपज नवा संभावित बाजार तक भेज पाही। किसान रेल के माध्यम ले सब्जी अउ फल के परिवहन करइया किसान या व्यापारी रायपुर, दुर्ग पार्सल ऑफिस या मुख्य वाणिज्य निरीक्षक पार्सल ले मुख्य पार्सल सुपरवाइजर रायपुर 9752877967 अउ चीफ पार्सल सुपरवाइजर दुर्ग 9109112682 ले विस्तृत जानकारी प्राप्त कर सकत हे।
रायपुर अउ दुर्ग स्टेशन ले किसान रेल के सुविधा, फल अउ सब्जी के भाड़ा म मिलही 50 प्रतिशत के छूट
