बेमेतरा, 06 जुलाई 2020। छत्तीसगढ़ शासन किसान मन के आमदनी बढ़ाए बर खेती बाड़ी ले जुड़े हर एक तकनीक के जानकारी किसान मन ल देहे जात हे। नवा खेती बाड़ी के जानकारी हासिल करके महिला मन घलोक अब खेती-किसानी ले जुड़के आत्म निर्भर बनत हें। आज ओ मन सब्जी के उत्पादन करके परिवार के आमदनी म इजाफा करत हें। बेमेतरा जिला के श्रीमती सतरूपा बाई सिरिफ सामान्य गृहणी रहिन वोखर परिवार के मुख्य काम खेती-बाड़ी ही हे। सतरूपा बाई ल कृषि विभाग के अधिकारी मन ह समझाईश दीन के ओ अपन खेत मन म सब्जी लगाके आमदनी बढ़ा सकत हे। कृषि विभाग कोति ले विभाग के आत्मा योजना के अंतर्गत सब्जी उत्पादन के प्रशिक्षण वोला देहे गीस अऊ ओ ल एखर बर सहायता राशि उपलब्ध कराए गीस, जेखर से वो ह बीज खाद अऊ आन आदान सामान खरीदीस। आत्मा योजना ले मिले प्रशिक्षण अउ सहायता राशि ले आज वो ह खेती-बाड़ी ले बनेच कमाई करे लगे हे।
आत्मा योजना ले प्रेरित होके बेमेतरा जिला के ग्राम बिलई गांव के महिला मन ह एक स्व-सहायता समूह बनाय हे अऊ ओ मन मशरूम उत्पादन के काम ले जुड़े हे। महिला समूह के श्रीमती किरण बाई ह बताइस के ओ मन ल कृषि विभाग के अधिकारी मन ह आत्मा योजना के बारे म बताइस तहां ले स्व-सहायता समूह के महिला मन मशरूम उत्पादन प्रशिक्षण लेहे बर तियार हो गीन। कृषि विभाग ह महिला स्व-सहायता समूह ल मशरूम उत्पादन बर सहायता राशि उपलब्ध कराए गीस। ये सब के सेती आज महिला मन बनेच मशरूम उत्पादन करके स्थानीय बाजार अऊ आन बाजार मन म मशरूम के विक्रय करके लाभ कमावत हें अऊ अपन परिवार के सहयोग करके ओ मन अपन परिवार के आर्थिक स्थिति सुदृढ़ करत हें।
