उपभोक्ता अब ऊर्जादाता बनत हें- जितेंद्र शर्मा
शासन के डबल सब्सिडी योजना ले मिलत हे प्रोत्साहन
अम्बिकापुर , प्राकृतिक ऊर्जा के सबले बड़का स्रोत सुरुज अब घर-घर ल रोशन करत हे। जिहां पहिली घर के बिजली खपत बढ़तेच बिल के समस्या रहिस, उहें अब प्रधानमंत्री सुरुज घर-मुफ्त बिजली योजना ले आम बिजली उपभोक्ता अब ऊर्जादाता बनत हें। अम्बिकापुर के बौरीपारा के रहवइया श्री जितेंद्र कुमार शर्मा ए बदलाव के नज़ीर बने हे।
बिजली बिल शून्य, अब अकतहा आय के साधन
श्री जितेन्द्र शर्मा ह अपन घर के छत म 5 केवी के सोलर प्लांट लगवाए हे। ए योजना के अंतर्गत ओ ल केंद्र सरकार ले 78 हजार अऊ राज्य सरकार ले 30 हजार, कुल 1 लाख 8 हजार रुपिया के सब्सिडी मिले हे। श्री शर्मा बताथे के पहिली ओखर हर महीना के बिजली बिल हजारों रुपिया तक आवत रहिस, फेर सोलर प्लांट लगे के बाद ले अब ओखर बिजली बिल शून्य हो गए हे। पाछू चार महीना म उमन सिरिफ 200 रुपिया बिल चुकाए हे। अतकेच ही न ही, घर म खपत के बाद जेन अकतहा बिजली बचत हे, ओला ओ ह विद्युत विभाग ल उपलब्ध करावत हे। एखर बदला ओ ल अवइया वित्तीय साल म भुगतान घलोक मिलही।
पीएम सुरुज घर-मुफ्त बिजली योजना के आसान प्रक्रिया, बड़का लाभ
श्री शर्मा ह बताइस के आवेदन प्रक्रिया अड़बड़ सरल हे। एक पइत आवेदन करे के बाद पूरा प्रक्रिया अपन आप पूरा हो गीस अऊ सोलर पैनल वोखर घर म स्थापित हो गे। ए पूरा प्रक्रिया म ओ ल कोनो प्रकार के परेशानी नइ होइस।
बिजली उपभोक्ता ले ऊर्जा उत्पादक बने के कोति बढि़स कदम
श्री जितेन्द्र शर्मा के कहना हे के ए योजना ह ओ मन ल न केवल बिजली बिल ले मुक्त करे हे बल्कि ऊर्जादाता बने के अवसर घलोक देहे हे। ओखर मानना हे के ये पहल केवल आर्थिक लाभ तक सीमित नइ हे, बल्कि पर्यावरण संरक्षण के दिशा म घलोक महत्वपूर्ण योगदान हे। पारंपरिक बिजली उत्पादन म कोयला अऊ आन प्राकृतिक संसाधन मन के उपयोग होथे, जेखर से पर्यावरण म असर परथे। फेर सौर ऊर्जा के उपयोग ले एखर असर ल कम करे जा सकत हे, जेखर से घर ल स्वच्छ सौर ऊर्जा मिलथे।
सरकार के प्रयास अऊ मनखे मन के भागीदारी
केंद्र अऊ राज्य सरकार के आभार व्यक्त करत श्री जितेन्द्र शर्मा ह कहिस के सरकार कोति ले देहे जात डबल सब्सिडी ह ए योजना ल आमजनता तक पहुंचाए खातिर म अहम भूमिका निभाए हे। एखर से मनखे जागरूक होवत हे अऊ जादा ले जादा मनखे सौर ऊर्जा अपनाए खातिर आगू बढ़त हें। उमन कहिन के, ये योजना केवल बिल कम करे बर नइ हे, बल्कि आत्मनिर्भरता, पर्यावरण सुरक्षा, स्वच्छ ऊर्जा अऊ मुफ्त बिजली के दिशा म एक बड़का कदम हे। हर घर ल एखर से लाभ उठाना चाही।