मुख्यमंत्री ह छत्तीसगढ़ म नाचा के जनक दाऊ दुलार सिंह मंदराजी के जयंती म उन ल करिन नमन

रायपुर, मुख्यमंत्री श्री भूपेश बघेल ह आज इहां अपन निवास कार्यालय म लोककला ‘नाचा‘ के जनक स्वर्गीय दाऊ दुलार सिंह मंदराजी के जयंती म ऊंखर फोटू म फूल चढ़ा के ओ मन ल नमन करिन। मुख्यमंत्री श्री बघेल ह छत्तीसगढ़ी लोककला के संरक्षण म दाऊ जी के अमूल्य योगदान ल सुरता करत कहिन कि दाऊ मंदराजी ह ‘नाचा‘ ल पुनर्जीवित करे अऊ ओला बचाए रखे बर अपन पूरा जीवन समर्पित कर दीन। उमन नाचा ल समाजिक कुरीति के प्रति जनचेतना जगाए के माध्यम बनाइन। श्री बघेल ह कहिन कि दाऊ जी ह लोक कलाकार मन ल संगठित करके छत्तीसगढ़ी नाचा-गम्मत ल विश्वपटल म स्थापित करे म महत्वपूर्ण भूमिका निभाईन। राज्य सरकार कोति ले कला के अइसन सच्चा साधक के सम्मान अऊ नाचा कला ल अक्षुण्ण बनाए रखे बर दाऊ दुलार सिंह मंदराजी सम्मान देहे जाथे। उमन कहिन कि मनखे मन म नाचा कला ल पुनर्स्थापित करइया लोक कलाकार के व्यक्तित्व अगला कई पीढ़ि मन ल प्रेरित करत रहिही।