कोंडागांव, 22 सितंबर 2020। छत्तीसगढ़ पुलिस ह मेदिनापुर के रहइया संधी शंकर बारीक, जीवन कृष्ण सिंघा ल पकड़े हे। इंकर खिलाफ छत्तीसगढ़ के भारतीय सेना म तैनात जवान प्रभु राम मरकाम ह फीमेल फ्रैंडशिप ऑनलाइन डेटिंग सर्विस के नाम म धोखाधड़ी करके अलग-अलग किश्त म बारा लाख रुपिया ठगे के शिकायत दर्ज करवाए रहिस। गिरफ्तार आरोपी मन ह बताइन के जऊन मोटियारी टूरी मन ल उमन काम म रखे रहिन ओ मन ल मनखे मन ल बात म फंसाए के ट्रेनिंग दे जात रहिस।
टूरी मन मनखे मन ले कहयं के वो तोर से प्यार करथे, बिहाव करना चाहथे। बाद म कभू वो मन कॉलेज के फीस बर त कभू क्लब म मेंबर बने के नाम म रजिस्ट्रेशन के पईसा के नाम म रुपिया मांगयं। उंखर मीठ-मीठ गोठ के चक्कर म मनखे बया जावयं तहां भरोसा जीत के मनखे मन ले टूरी मन अकाउंट के डीटेल घलोक मांग लेत रहिन, बाद म मनखे मन के खाता ले रुपिया निकाल लेत रहिन।
जम्मू कश्मीर म भारतीय सेना म तैनात जवान प्रभुराम मरकाम के संग मोबाइल फोन म फीमेल फ्रैंडशिप ऑनलाइन डेटिंग सर्विस के नाम म 12 लाख रुपिया के ठगइया दू आरोपी मन ल पुलिस ह पश्चिम बंगाल ले गिरफ्तार करे हे। न्यायालय म पेश करे के बाद उहां ले ओ मन ल जेल भेज दे गीस।
जानबा हे के प्रभुराम ह छुट्टी म अपन घर कोंडागांव जिला के विश्रामपुरी थाना के अंतर्गत अपन गृहग्राम म आए रहिस। ठगाए के बाद वो ह नौ सितंबर के विश्रामपुरी थाना म रिपोट दर्ज कराईस।
पुलिस ह धारा 420, 34 भादवि के तहत मामला दर्ज करे के बाद जांच शुरू करिस त ठग मन के बैंक खाता कोलकाता पश्चिम बंगाल ले संबंधित होना पाइस। तब एसपी सिद्धार्थ तिवारी ह टीम गठित करके कोलकाता पश्चिम बंगाल भेजिस।
कोलकाता जोधपुर म एक हफ्ता तक रहि के टीम आरोपी तक पहुंच तो गीस फेर गुपचुप तरीका ले उंखर गतिविधि मन ऊपर नजर रखीस। पूरा साक्ष्य जुटाए के बाद स्थानीय पुलिस के सहयोग ले आरोपी मन के पश्चिम मेदिनापुर स्थित कार्यालय म दबिश देके संचालक जीबन कृष्ण सिंघा (33) पुत्र राधाकृष्ण सिंघा अऊ संधी शंकर बारीक (42) पुत्र स्व. खगेन्द्र बारीक ल धरे गीस। दुनों पश्चिम मेदिनापुर निवासी ये।
