कुनकुरी के हर्राडांड़ म 18.20 एकड़ जमीन कलेक्टर ह करिस आबंटित
बिजली आपूर्ति म बाधा अऊ लो वोल्टेज के समस्या ले मिलही मुक्ति
जशपुरनगर, मुख्यमंत्री विष्णुदेव साय के पहल म जिला म 400 केव्ही विद्युत सब स्टेशन स्थापित करे के रद्दा साफ हो गए हे। सब स्टेशन स्थापित करे बर कुनकुरी ब्लाक के हर्राडांड़ म 18.20 एकड़ जमीन राज्य विद्युत वितरण कंपनी ल कलेक्टर डॉ रवि मित्तल ह आबंटित कर देहे हे। विद्युत विभाग के डीई एन आर भगत ह बताइस कि ए सब स्टेशन के बन जाय ले जिला म विद्युत आपूर्ति व्यवस्था म आमूलचूल सुधार आही। उमन बताइन के फिलहाल जिला म 132 केव्ही लाइन म बिजली के आपूर्ति बिलासपुर स्थित सब स्टेशन ले होथे। दूरी जादा होए के सेती तकनीकि समस्या आत रहिथे। जेखर से विद्युत आपूर्ति बाधित होथे। कई पइत लो वोल्टेज के समस्या के सामना घलोक करना परथे। उमन बताइन के ए सब स्टेशन के बन जाय ले ये जम्मो समस्या के हल हो जाही अऊ उपभोक्ता मन ल सरलग बिजली के आपूर्ति हो सकही। एखर संगेच पड़ोसी राज्य झारखंड ले होवइया बिजली आपूर्ति घलोक सुचारू अऊ बेहतर हो सकही। जिला म सब स्टेशन बन जाय ले झारखंड जवइया ट्रांसमिशन लाइन के गुणवत्ता म सुधार आ सकही। जेखर से उहां के उपभोक्ता मन ल घलोक राहत मिलही।
जानबा हे कि जिला म बुनियादी सुविधा पानी, बिजली, स्वास्थ्य, शिक्षा अऊ सड़क म सुधार लाय बर मुख्यमंत्री विष्णुदेव साय के नेतृत्व वाले छत्तीसगढ़ सरकार तेजी से काम करत हे। बीते 8 महिना म मुख्यमंत्री विष्णुदेव साय के पहल ले जिला म 220 बिस्तर वाले सर्वसुविधा अस्पताल के स्वीकृति के संग जिला ल 7 विशेषज्ञ चिकित्सक मिल गे हे। एखर संगेच कुनकुरी म कृषि अनुसंधान केन्द्र अऊ मयाली नेचर कैम्प ल देश के पर्यटन नक्शा म लाय बर 10 करोड़ रूपिया के स्वीकृति केन्द्र सरकार देहे हे।
विद्युत व्यवस्था दुरस्त करे जिला म स्थापित होही 176 नवा अकतहा ट्रांसफार्मर
आदिवासी बाहुल्य जशपुर जिला म विद्युत वितरण व्यवस्था ल चुस्त दुरूस्त करे बर मुख्यमंत्री विष्णुदेव साय के निर्देश म जिला प्रशासन तेजी ले काम करत हे। डीई भगत ह बताइस कि जिला म विद्युत व्यवस्था ल सुधार बर जिला ल अकतहा 274 ट्रांसफार्मर के स्वीकृति मिले हे। एमां ले 176 ट्रांसफार्मर लग गए हे। बिजली व्यवस्था ल सुचारू रखे बर लाइन अऊ ट्रांसफार्मर ल मेन्टेनेंस उपर जोर देहे जात हे। खराब मौसम संग आन कारण से फाल्ट आए म विद्युतकर्मी तुरंत ये मां सुधार बर पहल करत हें। एखर बर विभाग के अधिकारी अऊ कर्मचारी मन ल अर्ल्ट रखे गए हे। संगेच कर्मचारी मन के संख्या घलोक बढ़ाए जात हे। जेखर से जिला के विद्युत आपूर्ति सुचारू रूप ले चल सकय।
