संस्कृति संचालनालय म बनही फिल्म विकास निगम के सेल

  • प्राईमरी स्कूल के पाठ्य पुस्तक मन म राज्य गीत लिखे उपर विचार
  • कलाकार मन के मानदेय निर्धारण बर समिति गठन के प्रस्ताव
  • संस्कृति मंत्री ह करिन विभागीय कामकाज के समीक्षा

रायपुर, 11 फरवरी 2020। संस्कृति मंत्री श्री अमरजीत भगत ह अपन निवास कार्यालय म सोमवार के संस्कृति विभाग के कामकाज के समीक्षा करिन। श्री भगत ह संस्कृति संचालनालय म फिल्म विकास निगम के सेल गठित करे के हुकुम अधिकारी मन ल दीन।

श्री भगत ह अधिकारी मन ल कहिन कि सेल म प्रभारी अधिकारी नियुक्त करे के संगेच जरूरी कम्प्यूटर आदि उपकरण के घलोक व्यवस्था करव। उमन कहिन कि पुरखौती मुक्तांगन के तीर करीबन 300 एकड़ क्षेत्र म फिल्म सीटी के निर्माण करे जाही। फिल्म नीति करीबन बन के तियार हे अऊ ओखर जांच करे जात हे। श्री भगत ह फिल्म बनाए बर आन राज्य मन ले अवइया मन ल सुविधा देहे के घलोक बात कहिन। फिल्म निर्माण बर जरूरी गायन, वादन, अभिनय, लाईट, साउण्ड, कैमरा आदि के प्रशिक्षण राज्य के कलाकार मन ल कौशल विकास योजना मन ले जोड़के देहे जा सकय। एखर बर खैरागढ़ संगीत विश्वविद्यालय अऊ रायपुर के कमला देवी संगीत महाविद्यालय ले घलोक सहयोग लेहे जा सकत हे। उमन कहिन कि छत्तीसगढ़ी फिल्म ल बाजार मिलय एखर बर राज्य के जऊन जिला मन म सिनेमा घर नइ हे, उहां सिनेमा देखाए के व्यवस्था होनी चाही।

श्री भगत ह राज्य के प्राईमरी स्कूल के पाठ्य पुस्तक मन म राष्ट्रगान जन गण मन… के जइसे ही छत्तीसगढ़ के राज्यगीत अरपा पैरी के धार… ल घलोक शमिल करे के प्रस्ताव बनाए के निर्देश अधिकारी मन ल दिए हें। श्री भगत ह कहिन कि राज्य के कलाकार मन बर मानदेय निर्धारण बर समिति गठित करे जाय अऊ समिति म राज्य के कलाकार मन ल घलोक सामिल करे जाना चाही। श्री भगत ह छत्तीसगढ़ के कई जिला मन म होवइया आयोजन मन के सूची तियार करे ल कहिन। उमन मैनपाट महोत्सव बर घलोक तैयारी करे ल कहिन। श्री भगत ह छत्तीसगढ़ के संस्कृति ल प्रदर्शित करे बर राज्य के रतनपुर, डोंगरगढ़, दंतेवाड़ा, भोरमदेव, राजिम, सिरपुर आदि महत्वपूर्ण धार्मिक स्थान मन म पोस्टर आदि लगाय के बात कहिन। श्री भगत ह संस्कृति विभाग के बजट, निर्माण काम, पुरखौती मुक्तांगन म विकास काम आदि के समीक्षा करिन। बैठक म संस्कृति विभाग के सचिव श्री अन्बलगन पी., संचालक श्री अनिल कुमार साहू संग आन अधिकारी मौजूद रहिन।

एहू ल पढ़व ..  केन्द्र ले खाद्यान्न, केरोसिन के आबंटन म बढ़ोतरी के मांग करबोन: श्री भगत

लउछरहा..