रायपुर, 30 सितंबर 2020। छत्तीसगढ़ शासन के राजस्व अऊ आपदा प्रबंधन विभाग कोति ले जिला कलेक्टर के माध्यम ले कई ठन प्राकृतिक आपदा मन ले पीड़ित मन ल राजस्व परिपत्र के प्रावधान के तहत आर्थिक सहायता मंजूर करे जाथे। अइसनहेच प्रकरण मन म रायगढ़ जिला के तहसील तमनार के ग्राम गोढ़ी के महेश्वर सिदार अऊ ग्राम बालजोर के कलावती के मृत्यु पानी म बूड़े ले, ग्राम जांजगीर के साधूराम के मृत्यु आगी म जले ले अऊ ग्राम तराईमाल के सावित्री के मृत्यु पानी म बूड़े ले होए म मृतक मन के परिजन मन ल चार-चार लाख रूपिया के आर्थिक अनुदान सहायता स्वीकृत करे गए हे।
अइसनहे बेमेतरा जिला म राजस्व पुस्तक परिपत्र 6-4 के तहत तहसील नवागढ़ के ग्राम नांदल के चंद्रिका निर्मलकर, सुकलपारा के बलराम अऊ ग्राम गोपालपुर के रंजीत सोनवानी के मृत्यु सांप के काटे ले होए म अऊ बेमेतरा तहसील के ग्राम कठौतिया के कु. ज्योति ध्रुव अऊ ग्राम बंधी के जान कुंवर बाई के मृत्यु पानी म बूड़े ले होए म मृतक मन के पीड़ित परिजन मन ल चार-चार लाख रूपिया के आर्थिक सहायता स्वीकृत करे गए हे।
