मुख्यमंत्री श्री भूपेश बघेल ह फिंगेश्वर के किसान बिसेलाल साहू के इहां करिस भोजन

गरियाबंद, मुख्यमंत्री श्री भूपेश बघेल भेंट मुलाकात कार्यक्रम के बेरा म आम जनता ले सीधा गोठ करके न केवल उंखर समस्या मन के निराकरण करत हें, भलुक छत्तीसगढ़िया संस्कृति, खानपान अऊ जीवनशैली ल घलोक बढ़ावा देवत हें। मुख्यमंत्री श्री बघेल आज जेवन करे खातिर फिंगेश्वर म किसान बिसेलाल साहू के घर पहुंचिन। मुख्यमंत्री के घर पहुंचे म बिसेलाल के परिवार वाले मन के चेहरा म खुशी साफ झलकत रहिस। उमन पूरा मया के संग मुख्यमंत्री के स्वागत करिन।
मुख्यमंत्री श्री बघेल ल पारंपरिक छत्तीसगढ़िया भोजन अऊ व्यंजन परोसे गीस। पारंपरिक तरीका ले कांसा के थारी म परोसे गए भोजन म बथुआ भाजी, तिवरा भाजी, जिमिकंदा, दाल पालक, बिजौरी, गुलगुला अऊ सिलबटा ले पीसे पताल के चटनी ल मुख्यमंत्री ह सादगी के संग ग्रहण करिन। मुख्यमंत्री श्री बघेल ह बिसेलाल के परिवार वाले मन के हाल चाल पूछिन अऊ मया के संग परूसे गए स्वादिष्ट भोजन बर उनला धन्यवाद दीन। बिसेलाल साहू के घर म मुख्यमंत्री के संग खाद्य मत्री श्री अमरजीत भगत, राजिम विधानसभा के विधायक श्री अमितेश शुक्ल, आन जनप्रतिनिधियों ह घलोक संग म भोजन ग्रहण करिन।