रायपुर, 9 जून 2020। प्रदेश म पुलिस विभाग के अधिकारी अउ कर्मचारी मन के द्वारा आम जनता के संग दुर्व्यवहार के गंभीर मामला आगु आये के बाद डीजीपी ह नाराजगी जताये हे. डीजीपी डीएम अवस्थी ह सबो रेंज के आईजी अउ पुलिस अधीक्षक मन ल कार्रवाई के निर्देश दे हे. डीजीपी ह कहिन कि प्रदेश म यदि कोनो पुलिस अधिकारी ह कोनो भी आमजन मन ले दुर्व्यवहार करही त ओला तत्काल प्रभाव ले निलंबित कर आपराधिक प्रकरण दर्ज करे जाही. डीजीपी ह अधिकारी मन ल अपन अधीनस्थ मन उपर कठोर नियंत्रण रखे के निर्देश दीस. डीजीपी ह कहिन कि एखर पहली घलो कई बार निर्देशित करे गे हे कि आम नागरिक मन के संग पुलिस के व्यवहार सम्मानपूर्ण अउ सहानुभूतिपूर्ण होना चाही. हाल ही म कुछ घटना प्रकाश म आये हे, जोन म पुलिस अधिकारी अउ कर्मचारी मन के द्वारा आम जनता के संग दुर्व्यवहार अउ जबरन मारपीट करे गे हे. अइसे मामला के सेती विभाग म लम्बा बेरा ले मेहनत करत ईमानदार अउ अनुशासित पुलिसकर्मी मन के सबो मेहनत म पानी फेर जाथे. अउ पुलिस के नकारात्मक छवि जनमानस के आगु आथे. उमन निर्देश दे हे कि हाल म घटित ये प्रकार के प्रकरण मन के उपर विभागीय जांच करके कार्यवाही करे जाही.
