दुर्ग, 04 मार्च, 2020। रसाइनिक कीटनाशक के नुकसान ल देखत अब किसान भाई मन अब देशी कीटनाशक के प्रयोग करत हें। अइसनहे एक असरकारी देसी कीटनाशक अग्निअस्त्र ह आए जेमा रसाइनिक पदार्थ के प्रयोग नइ होवय। येला बनाए बनाए बर जरूरी सामान म 05 लीटर देशी गाय के मूत्र, 500 ग्राम तम्बाकू पत्ता, 250 ग्राम हरियर मिर्चा, 250 ग्राम लहसुन, 2.5 किलो नीम के पना के जरूरत होथे।
अग्निअस्त्र बनाए बर एक बर्तन म 5 लीटर देसी गाय के मूत्र लेके ये मा 500 ग्राम तंबाकू, ढाई सौ ग्राम हरियर मिर्चा अऊ ढाई सौ ग्राम लहसुन, ढाई किलो नीम के पपाना ल कूटके मिलाना हे। फेर ये घोल के पांचवा हिस्सा रहे तक आगी म चढ़ा के डबकाना हे। अऊ 24 घंटा बर किंडवन होए बर रख देना हे, दूसर दिन ये घोल ल सूती कपड़ा ले छान लेना हे। छनाए घोल आपके आग्नेय अस्त्र ये। एला तीन महिना तक स्टोर करके रख सकत हव।
आग्नेय अस्त्र के प्रयोग लाही, थ्रिप्स, पत्ती लपेटक, तना छेदक, फल छेदक, फली छेदक, अउ मिलीबग कीट मन के नियंत्रण बर करे जा सकत हे। एखर 100ml ल 5 लीटर पानी म मिलाके संझा के बेरा स्प्रे करना चाही।
