विधायक प्रबोध मिंज संग आन विधायक फिरोजाबाद बर रवाना
नई दिल्ली, 8 जून 2024। छत्तीसगढ़ के मुख्यमंत्री श्री विष्णुदेव साय ह उत्तर प्रदेश के फिरोजाबाद म होए हादसा म घायल मन के बेहतर उपचार सुनिश्चित करे बर एक टीम रवाना करे हे। जानबा हे के छत्तीसगढ़ ले धार्मिक यात्रा म गए श्रद्धालु मन ले भरे बस उत्तर प्रदेश के फिरोजाबाद म आगरा-लखनऊ एक्सप्रेस म आज भिनसरहा पलट गए रहिस। वो दुर्घटना म तीन के निधन संग 40 मनखे घायल हो गए रहिन।
छत्तीसगढ़ के मुख्यमंत्री श्री विष्णुदेव साय ह नई दिल्ली ले ही घायल मन के बेहतर उपचार सुनिश्चित करे अउ उत्तरप्रदेश सरकार ले समन्वय बर विधायक प्रबोध मिंज के अगुवई म एक टीम गठित करके लखनऊ भेजे हे। टीम म आन विधायक मन संग आवासीय आयुक्त श्रुति सिंह तको हें।
मुख्यमंत्री ह बताइस के हादसा म घायल मन ल जिला संयुक्त चिकित्सालय शिकोहाबाद अऊ फिरोजाबाद मेडिकल कालेज म इलाज बर भर्ती कराए गए हे। जिला प्रशासन ले बात करके डॉक्टर मन ल उचित देखभाल के निर्देश देहे गए हे अउ उच्चाधिकारी मन ल घलोक ए बाबत जरूरी निर्देश देहे गए हे।
