ग्राम मटंग म स्वर्गीय श्री पंथराम वर्मा के मूर्ति अनावरण के मौका म मुख्यमंत्री ह कहिन
दुर्ग, सरवोदय आंदोलन ले जुड़े मध्य प्रदेश भूदान बोर्ड के पहिली अध्यक्ष स्वर्गीय श्री पंथराम वर्मा के मूर्ति के अनावरण आज मुख्यमंत्री श्री भूपेश बघेल ह दुर्ग जिला के मटंग गांव पहुंचके करिन। उमन परिवार अऊ गांव वाले मन के उपस्थिति म स्वर्गीय श्री पंथराम वर्मा के मूर्ति म फूल चढ़ा के ओ मन ल नमन करिन। मुख्यमंत्री एखर बाद स्वर्गीय श्री पंथराम वर्मा के निवास पहुंचिन अऊ ऊंखर परिवारजन के संग रूबरू होइन। परिवारजन मन ले मुलाकात के बाद उमन स्वर्गीय श्री वर्मा के संग अपन बचपन के अनुभव ल साझा करत बताइन कि ओ मन वो सौभाग्यशाली मनखे म ले एक हें, जेला स्वर्गीय श्री पंथराम वर्मा जइसे विद्वान अऊ सरल स्वभाव वाले मनखे के स्नेह अऊ मार्गदर्शन मिले हे। स्वर्गीय श्री वर्मा ह दुर्ग के इंदिरा मार्केट म जब महात्मा गांधी जी के आगमन होए रहिस ओ समय उमन अपन पिताजी के खांध म बइठके गांधी जी के दर्शन करे रहिन। उमन कहिन कि स्वर्गीय श्री वर्मा एक लेखक अऊ गांधीवादी रहिन। ओ मन ल कोनो पद के लालसा नइ रहिस, ओ मन सरवोदय आंदोलन के एक प्रमुख स्तंभ रहिन। मुख्यमंत्री ह कहिन कि स्वर्गीय श्री वर्मा सामाजिक अउ सांस्कृतिक काम मन म सक्रिय रहत रहिन।
मुख्यमंत्री ह ग्रामवासी मन ल देवउठनी के बधाई घलोक दीन अऊ किसान मन ल धान विक्रय के समय नमी ले संबंधित गाइडलाइन ल ध्यान म रखके धान, धान खरीदी केंद्र म ले जाय के सलाह दीन ताकि ओ मन ल कोनो प्रकार के दिक्कत के सामना झन करना परय।
