09 ले 13 जनवरी तक गांव दुधली म जुरिहीं देश-विदेश के 15 हजार रोवर-रेंजर
रायपुर, बालोद जिला बर ए हा भारी गरब के बात आय के भारत स्काउट्स अउ गाइड्स, नई दिल्ली के अगुवई म जिला मुख्यालय बालोद के तीर के गांव दुधली म 09 ले 13 जनवरी 2026 तक ‘पहली राष्ट्रीय रोवर-रेंजर जंबूरी’ के बड़का अउ भव्य आयोजन होवईया हे। ए आयोजन देश म पहली पईत होवत हे, जेमा छत्तीसगढ़ के 4,252 संगेच देश-विदेश ले कुल 15,000 रोवर, रेंजर अउ सीनियर स्काउट-गाइड भाग लेहीं।
09 जनवरी के राज्यपाल करहीं जंबूरी के सुभारंभ
पहली राष्ट्रीय रोवर-रेंजर जंबूरी के सुभारंभ सुकवार 09 जनवरी 2026 के मंझन 2:00 बजे राज्यपाल श्री रमेन डेका के मुख्य आतिथ्य म करे जाही। कार्यक्रम के अध्यक्षता भारत स्काउट्स अउ गाइड्स के राष्ट्रीय अध्यक्ष अउ पूर्व राज्यसभा सांसद डॉ. अनिल जैन करहीं।
उद्घाटन समारोह म अति विशिष्ट अतिथि के रूप म प्रदेश के स्कूल शिक्षा मंत्री श्री गजेन्द्र यादव, कांकेर लोकसभा सांसद श्री भोजराज नाग, मुख्य राष्ट्रीय आयुक्त डॉ. के.के. खंडेलवाल मौजूद रहिहीं। एकर अलावा विधायक मन, राज्य अउ जिला प्रशासन के बड़े अधिकारी, भारत स्काउट्स अउ गाइड्स के राष्ट्रीय अउ राज्य पदाधिकारी, अउ स्थानीय जनप्रतिनिधि घलो समारोह के मान बढ़ाहीं।
12 जनवरी के मुख्यमंत्री होहीं समापन समारोह के मुख्य पहुना
जंबूरी के समापन के मउका म 12 जनवरी 2026 के मुख्यमंत्री श्री विष्णुदेव साय मुख्य पहुना के रूप म मौजूद रहिहीं। एकर संगेच आयोजन के अलग-अलग दिन मन म विधानसभा अध्यक्ष डॉ. रमन सिंह, केन्द्रीय राज्य मंत्री श्री तोखन साहू, उपमुख्यमंत्री श्री अरुण साव, वन मंत्री श्री केदार कश्यप, वित्त मंत्री श्री ओ.पी. चौधरी संग कतको राष्ट्रीय अउ राज्य स्तर के अतिथि शामिल होहीं।
भारतीय अउ वैश्विक संस्कृति के दिखही अनुपम झलक
पांच दिन के ए आयोजन के दौरान छत्तीसगढ़ संग देश के अलग-अलग राज्य अउ आन देश ले आए मनखे मन डहर ले रंगारंग सांस्कृतिक कार्यक्रम के प्रस्तुति दे जाही। ए जंबूरी के माध्यम ले छत्तीसगढ़ी अउ भारतीय संस्कृति के संग-संग वैश्विक संस्कृति के घलो बढ़िया झलक देखे बर मिलही।
रोमांचक अउ शैक्षणिक गतिविधि मन के होही आयोजन
जंबूरी के दौरान मार्च पास्ट, क्लोजिंग सेरेमनी, एथनिक फैशन शो, एडवेंचर एरिया, वॉटर स्पोर्ट्स, कैंप फायर, रोड कैंप फायर, राज्य प्रदर्शनी, आदिवासी कार्निवल, राष्ट्रीय युवा दिवस, मास ट्री प्लांटेशन, आपदा प्रबंधन, बैंड प्रतियोगिता, युवा सांसद, क्विज प्रतियोगिता, लोक नृत्य संग कतको शैक्षणिक, सांस्कृतिक अउ साहसिक गतिविधि आयोजित करे जाही।
सुविधा, सुरक्षा अउ स्वास्थ्य के पक्का बेवस्था
भारत स्काउट्स अउ गाइड्स जंबूरी काउंसिल अउ जिला प्रशासन डहर ले आयोजन स्थल म सबो जरूरी व्यवस्था पक्का करे गे हे। जंबूरी मार्केट म खाए-पिए के सामान, दवाई अउ जरूरी चीज मिलही। साफ पिए के पानी, शौचालय, नहाय के घर अउ साफ-सफाई के व्यवस्था, 30 बिस्तर वाला अस्थायी अस्पताल, 24 घंटा डॉक्टरी सुविधा, आगी बुझाए के गाड़ी, पुलिस, यातायात अउ सुरक्षा बल के तैनाती संग एनडीआरएफ टीम के विशेष तैनाती रही।
राज्य अउ जिला बर ऐतिहासिक आयोजन
पहली राष्ट्रीय रोवर-रेंजर जंबूरी के आयोजन बालोद जिला अउ पूरा छत्तीसगढ़ राज्य बर ऐतिहासिक उपलब्धि आय। ए आयोजन ले न सिरिफ जिला के पहचान राष्ट्रीय स्तर म मजबूत होही, भलुक युवा मन म नेतृत्व, सेवा अउ राष्ट्र निर्माण के भावना घलो बाढ़ही।
