प्रदेश के पहिली गन्ना हार्वेस्टर मशीन ले बालोद के किसान मन ल मिलिस सुबिधा

बालोद, जिला के गन्ना उपजइया किसान मन बर जिला प्रशासन के नवा पहल ह असीस साबित होवत हे। जिला खनिज न्यास (DMF) के आर्थिक सहयोग ले दंतेश्वरी मैया सहकारी शक्कर कारखाना ल प्रदेश के पहिली अत्याधुनिक गन्ना हार्वेस्टर मशीन उपलब्‍ध कराए गे हे। एकर ले जिला म गन्ना कटाई के काम ह तकनीक ऊपर आधारित अउ जादा असान हो गे हे।
कारखाना के प्रबंध संचालक श्री आर.पी. राठिया ह बताइन के ए मशीन ह हर दिन 80 ले 100 टन तक गन्ना के कटाई अउ छिलाई करे म सक्षम हे। कटाई, छिलाई अउ लोडिंग के जम्मो काम एक संग होय ले मिहनत अउ मजदूरी के खरचा म बड़ कमी आही, संग म किसान मन ल मजदूर मन के खोज-खबर करे के संसो ले घलो राहत मिलही।
मशीन ले कटाई करे के बाद ठूँठ ल अलग ले साफ करे के जरूरत नइ परही अउ गन्ना ह सीधा इनफील्डर के मदद ले ट्रैक्टर या ट्रक म लोड हो जाही, जेकर ले पहुँचाई के काम घलो झटकुन होही। ग्राम दुधली के किसान श्री प्रेमशंकर देशमुख ह बताइन के ए पहल ले खेती के खरचा घटही अउ बखत के बचत होही, जेकर ले गन्ना के फसल ह जादा फायदा वाला बनही। ए पहल ह जिला म खेती-किसानी के मशीनीकरण के रद्दा म एक बड़का उपलब्धि आय।
Sugarcane Harvester Machine Chhattisgarh