गरियाबंद म मत्स्य पालक किसान सोहन ठाकुर ह मछली ले बदलिस अपन किस्मत

पहिली के तुलना म तीन गुना आय अर्जित करके कमावत हे लाखों

गरियाबंद, विकासखंड छुरा अंतर्गत ग्राम चितामाड़ा के मत्स्य पालक किसान सोहन ठाकुर के खेती अऊ मजदूरी ले सलाना आय करीबन 1 लाख 50 हजार रूपिया कमावत रहिस। फेर जब ले मत्स्य पालन के क्षेत्र म वो ह जुड़े हे तब ले वोखर वार्षिक आय करीबन तीन गुना मने 4 लाख 50 हजार रूपिया तक पहुंच गए हे। जेखर से परिवार के आर्थिक स्थिति म सुधार होए लगे हे।
वो ल मछली पालन विभाग के अधिकारी मन नवा तकनीकी ले मछली पालन के जानकारी दीन तब ओ ह मछली पालन बर तैयारी करे के सोचिस। विभाग ह 0.2 हे. जमीन म संवर्धन तालाब के निर्माण कराइस संगेच स्पान संवर्धन योजना ले 25 लाख स्पान मत्स्य बीज, जाल अऊ फिश माऊन्ट ग्रोथ प्रमोटर विभाग कोति ले शत प्रतिशत अनुदान म प्रदान करे गीस। तब ले मछली पालन ल वो ह एक व्यवसाय के रूप म अपना के अपन आमदानी म बढ़ोतरी करे लगे हे।

वोकर बताती मछली पालन क्षेत्र म जुड़े ले हमार परिवार के आर्थिक स्थिति म काफी सुधार आइस। हमार परिवार म कुल 6 सदस्य हे। सबो के जीवन सिरिफ खेती उपर निर्भर रहिस। मछली पालन के व्यवसाय म जुड़े ले हमार जीवन म बहुत जादा सुधार आइस। वो ह अभी हाल म कतला, रोहू, मृगल, तिलपीया मछली के पालन करत हे अऊ बजार मन बेंचत हे।