सुदुर वनांचल म मछली पालन ले लाखों के कमई, मछली पालन ल कृषि के दर्जा मिले ले उत्साहित हे मत्स्यपालक किसान

बीजापुर, 25 अगस्त 2021। प्रदेश म मछली पालन ल कृषि के दर्जा मिले ले वनांचल के किसान मन म घलोक खासा उत्साह देखे ल मिलत हे। बीजापुर जिला म कई आदिवासी परिवार मन ह एला आय के अकतहा आमदनी के जरिया बना लेहे हें। भोपालपट्टनम के श्री वेंकट रमन के कहना हे कि मछली पालन बहुतेच लाभदायक हे। मछली पालन म जिहां लागत कम हे उहें आमदनी जादा हे। मछली पालन ले ओ ल सात ले आठ लाख रूपिया के आमदनी मिलत हे। एखर अलावा वो ह मछली पालन ले होवइया आमदनी ले अपन दस एकड़ खेत म सिंचाई बर दू नलकूप के खनन घलोक कराए हे।
मत्स्य पालक वेंकट रमन के बताती मछली पालन ल कृषि के दर्जा मिले ले मत्स्य पालक किसान खुश हें ए किसान मन ल मछली पालन बर जिहां सस्ता दर म ऋण मिले लगे हे उहें ओ मन ल आन सुविधा घलोक मिले लगे हे। वो ह बताइस के पहिली ओ ह खेती किसानी करत रहिस फेर मछली पालन म होवइया आमदनी ल देखत वो ह सवा एकड़ खेत म मछली पालन बर ढाई लाख रूपिया के लागत ले तालाब निर्माण कराए हे। आधुनिक तौर तरीका ले मछली पालन बर वोला मछली पालन विभाग ले प्रशिक्षण घलोक मिले हे। वो ह बताइस के अपन सवा एकड़ तालाब म जिहां पहिली खेती करे जात रहिस तिहां अब पूरा मछली पालन करे जात हे। मछली पालन बर हर सीजन म ओ ह करीबन 5 हजार मछली बीज डारथे। परिवार के मनखे मन घलोक ये काम म मदद करथें। मछली बीज के बढ़वार बर गांवे के गोबर के उपयोग करे जात हे एखर अलावा मछली पालन विभाग कोति ले घलोक मत्स्य आहार उपलब्‍ध कराए जात हे। मछली उत्पादन के काम ओ ह पाछू तीन साल ले करत हे। तालाब ले निकलइया मछली के अच्छा खपत आस-पास के गांव मन म हो जाथे।
मछली पालक वेंकट रमन के बताती मछली पालन ले होवत आमदनी ल देखत ओ ह एक एकड़ म अऊ तालाब बनवावत हे। अभी हाल म वो ह अपन परिवार के संग खुशहल जीवन व्यतीत करत हे। वोखर परिवार म मछली पालन ले होवइया आमदनी ले ओ मन ल तरक्की के नवा रद्दा मिले हे।