मनरेगा ह करिस सपना ल पूरा : सुकमन के खेत म मछलीपालन बर बनिस तलाब

धमतरी, 14 जुलाई 2021। मछलीपालक संगवारी मन के संग उठत-बइठत किसान सुकमन मरकाम ह घलोक सपना देखिस कि ओखर घलोक एक निजी तालाब होना चाही जेमा मछलीपालन करके ओ ह अपन आमदनी बढ़ा सकय। ओ ह गांव के अधिकांश किसान मन के जइसे वर्षा आधारित खेती करत रहिस। सिंचाई के साधन नइ होए के सेती बरसात के बाद कोनो अऊ फसल लेहे के संभावना होत नइ रहिस। अपन संगवारी मन ले ओ ह मछलीपालन ले कम समय म होवइया कमई के बारे म सुनत रहिस। ए हर वोखर मन म घलोक मछलीपालन के सपना जगा दे रहिस।
धमतरी जिला के नगरी विकासखंड के सरईटोला (मा.) ग्राम पंचायत के आश्रित गांव गट्टासिल्ली (रै.) के किसान सुकमन मरकाम के ये सपना मनरेगा (महात्मा गांधी राष्ट्रीय ग्रामीण रोजगार गारंटी अधिनियन) ह पूरा कर दीस। वो ह मछलीपालन बर अपन निजी जमीन म तालाब के मांग ग्राम पंचायत ले साझा करिस। ग्राम पंचायत के पहल ले मनरेगा ले वोखर बर तीन लाख रूपिया के लागत ले निजी तालाब के निर्माण के काम स्वीकृत होइस। पाछू साल नवम्बर म तालाब के खुदाई शुरू हो गीस अऊ ये साल मई म एकर काम पूरा हो गए। तालाब खुदाई के समय गांव के 76 श्रमिक मन ल 1424 मानव दिवस के रोजगार प्राप्त होइस, जेखर बर ओ मन ल दू लाख 71 हजार रूपिया के मजदूरी भुगतान करे गीस। सुकमन मरकाम के परिवार ल घलोक ये काम म 54 मानव दिवस के सीधा रोजगार मिलीस, जेखर एवज म ओ ल दस हजार 260 रूपिया के मजदूरी मिलीस।
मनरेगा ले श्री सुकमन मरकाम के खेत म 30 मीटर लंबाई अऊ ओतकेच चौड़ाई के तालाब खोदे गीस। ओ ह बताथे कि आसपास के जलस्रोत अऊ बारिश के पानी ले तालाब भर गए हे। वो ह ये मा सात किलो मछली बीज (स्पान) डारे हे। कुछ दिन बाद बाजार म बेचे लइक मछली तियार हो जाही अऊ सुकमन मरकाम के सपना साकार हो जाही। तालाब के पानी ले अल्प वर्षा के स्थिति म ओ ह अपन खेत मन के सिंचाई घलोक कर सकही। मनरेगा ले बने ये तालाब सुकमन मरकाम ल आजीविका बर मछलीपालन के मजबूत विकल्प देहे के संगेच सिंचाई बर पानी उपलब्‍ध कराके वोखर फसल मन के पैदावार घलोक बढ़ाही। एखर से वोखर कमई बाढ़ही अऊ परिवार के आर्थिक समृद्धि के रद्दा खुलही।