महासमुंद, 4 अक्टूबर 2020। वन मंत्री मोहम्मद अकबर के निर्देशानुसार वन विभाग द्वारा राज्य भर म वन मन म अवैध शिकार, लकड़ी के कटाई अउ अवैध परिवहन उपर रोकथाम सहित वन मन के सुरक्षा बर कार्रवाई सरलग जारी हे। इही तारतम्य म अपर प्रधान मुख्य वन संरक्षक अरूण पाण्डेय ह बताइस कि शनिवार के वन परिक्षेत्र महासमुंद के अंतर्गत चीतल के शिकार म ग्राम झुमरबाड़ी गौरखेड़ा अउ सिरगिड़ी के पांच आरोपी मन ल वन अउ पुलिस विभाग के संयुक्त टीम द्वारा गिरफ्तार करके जेल भेजे के कार्रवाई करे गिस।
ए संबंध म मुखबिर ले मिले सूचना के आधार म संयुक्त टीम द्वारा तीन अक्टूबर के बिहनिया 9 बजे ग्राम झुमरबाड़ी गौरखेड़ा के मुख्य अभियुक्त बसंत वल्द नीलू खड़िया के घर जाके गहन तलाशी लेहे गिस। उहां मौका म शिकार म करंट लगाये बर प्रयुक्त दू बंडल जी.आई. तार अउ चीतल के खोपड़ी, जबड़ा अउ गर्दन के हड्डी जब्त करे गिस। मुख्य अभियुक्त ले पूछताछ के आधार म आने चार आरोपी ग्राम झुमरबाड़ी गौरखेड़ा के तोरण वल्द मंगलू खड़िया, चंदूराम वल्द बुधराम धु्रव अउ ग्राम सिरगिड़ी के हरिचंद वल्द बड़कू साहू अउ लोकू वल्द केजउ दीवान ल घलो गिरफ्तार करके वन अपराध प्रकरण के तहत कार्रवाई करे गिस। तत्पश्चात् उंखर खिलाफ आवश्यक कार्रवाई करत हुए सबो पांच आरोपी मन ल जेल भेज देहे गे हे। मुख्य वन संरक्षक रायपुर जे.आर. नायक ह बताइस कि उक्त कार्रवाई के दौरान वनमण्डलाधिकारी महासमुंद मयंक पाण्डेय के निर्देशानुसार गठित विभागीय टीम म उप वनमण्डलाधिकारी एस.एस. नाविक, सहित वन परिक्षेत्र अधिकारी राकेश चौबे, नवीन कुमार शर्मा, रूपेश कन्नौजे अउ नीलकंठ साहू आदि विभागीय अमला के सराहनीय योगदान रिहिस हे।
