प्रदेश के छात्रावास मन म दू हज़ार सीट के होही बढ़ोतरी

मुख्यमंत्री श्री साय ह करिन आठ करोड़ रुपिया ले जादा लागत ले बने पाँच कन्या छात्रावास के शुभारंभ
अनुसूचित जाति के तीन सौ छात्रा मन ल पढ़ई बर आवासीय सुविधा मिलही
श्रमिक कल्याण योजना मन ले घलोक लाभान्वित होइन कई परिवार, छात्रा मन ल निःशुल्क साइकिल वितरण घलोक करे गीस
एक पेड़ माँ के नाम अभियान के तहत मुख्यमंत्री ह कन्या आश्रम म रोपिन रामफल के पौधा

रायपुर, 03 अगस्त 2024/ मुख्यमंत्री श्री विष्णुदेव साय ह आज आरंग म पाँच कन्या छात्रावास के शुभारंभ करिन। पाँचो छात्रावास के शुरू हो जाय ले अनुसूचित जाति के तीन सौ कन्या मन के अपन पढ़ाई बर आवासीय सुविधा मिलही। ए छात्रावास मन के लागत आठ करोड़ छै लाख रूपिया ले जादा हे। मुख्यमंत्री ह पोस्ट मैट्रिक अनुसूचित जाति कन्या छात्रावास आरंग के 100 सीटर लागत 174.67 लाख, प्री मैट्रिक अनुसूचित जाति कन्या छात्रावास मंदिर हसौद,  50 सीटर लागत 174.67 लाख,  अनुसूचित जाति कन्या आश्रम आरंग 50 सीटर लागत 162.76 लाख, अनुसूचित जाति कन्या छात्रावास आश्रम 50 सीटर लागत 162.76 लाख, नवीन प्री मैट्रिक अनुसूचित जाति कन्या छात्रावास आरंग 50 सीटर लागत 152.97 लाख रूपिया के शुभारंभ करिन। मुख्यमंत्री ह कन्या छात्रावास परिसर म एक पेड़ माँ के नाम अभियान के तहत रामफल के पौधा के रोपण करिन।

ए बेरा म उमन प्रदेश के सबो हॉस्टल, छात्रावास मन म दू हजार सीट के वृद्धि करे के घोषणा करिन। मुख्यमंत्री ह माइनर नगर वितरक शाखा क्रमांक-एक पोढ़ापार रसोटा तुलसी केशला के जीर्णेद्धार, आरंग एसडीएम अऊ तहसील कार्यालय के कर्मचारी मन बर घर के निर्माण, आरंग रेस्ट हाउस के विस्तार अऊ जीर्णेद्धार करे के घोषणा करिन। ए मौका म विधायक गुरू श्री खुशवंत साहेब के मांग म भण्डारपुरी गुरुद्वारा परिसर के निर्माण बर 17 करोड़ रूपिया के मंज़ूरी घलोक देहे गीस।

मुख्यमंत्री श्री विष्णु देव साय ह छात्रावास के लोकार्पण कर छात्रा मन ल बधाई दीन। उमन कहिन कि मोला ए बात के खुशी हे कि ए भवन मन के माध्यम ले अनुसूचित जाति वर्ग के हमर बेटी मन सुविधापूर्ण तरीका ले अपन शिक्षा ल जारी रख सकहीं अऊ बने सहिन पढ़-लिखके अपन माता-पिता अऊ हमार प्रदेश के नाम रोशन करहीं। मुख्यमंत्री श्री साय ह कार्यक्रम ल संबोधित करत कहिन कि शिक्षा विकास के असली मंत्र हे। शिक्षा केवल नौकरी पाय के माध्यम ही नइ हे भलुक ओखर से घलोक बढ़के एक आदर्श समाज के नींव हे। कोनो काम ल बने सहिन करे बर शिक्षा के अहम योगदान होथे। 15 साल प्रदेश म डॉ. रमन सिंह के सरकार रहिस, ए 15 साल म प्रदेश म शिक्षा के विकास बर बहुत अकन काम होइस। ओ समय हमार प्रदेश के शैक्षणिक संस्थान टॉप म रहिस। वोकरे परिणाम हे कि आज प्रदेश म 10 ले जादा मेडिकल कॉलेज हे।