शेम्पू बेचे के बहाना सेक्टर एरिया म रेकी करत आगरा के पांच मनखे मन ल पुलिस ह धरिस

दुर्ग, 07 मार्च 2020। भिलाईनगर पुलिस ह आगरा के 05 मनखे ल पकड़े हे जऊन सेक्टर एरिया म शैम्पू बेचत संदिग्ध हालात म घूमरत रहिन। पुलिस ह ऊंखर समान के जांच करिस त पाइस के उमन ब्रांडेड कंपनी के जुन्ना उपयोग करे गए शैम्पू के बोतल म नकली शैम्पू डार के बेंचत रहिन। ये संबंध म पूछे ले उमन बताइन के उमन दिल्ली ले माल ला के बेंचत हें अऊ दुर्ग-भिलाई कब के आए हें अउ कंहा रुके हे ये बारे म उमन आने-ताने बयान दीन। अड़बड़ पूछताछ म घलोक जब पुलिस ल उमन बने सहिन सही जवाब नइ दीन त पुलिस ह ओ मन ल हिरासत म ले लीस। पुलिस के बताती इमन शेम्‍पू बेंचे के बहाना इलाका म घूम-घूम के रेकी करत हें अऊ मौका देखके चोरी-डकैती जइसे घटना ल अंजाम देवत हें। पुलिस ह इंकर विरुद्ध प्रतिबधात्मक कार्यवाही करे हे। पकड़े गए संदेही मन म छोटू अली वल्द भूरा अली, नासिर वल्द शौकत अली, रहीम वल्द सौदान, शाहनवाज पिता अशफाक अउ हैदर अली वल्द शमशुदीन बताए जात हे जेन मन टेडी बगिया, इस्लाम नगर, आगरा के रहवइया यें।