राज्य अऊ केंद्र शासित प्रदेश मन मेरन अभी 90 लाख ले जादा खुराक हवय, जेला लगाए जाना हे
अवईया तीन दिन म राज्य मन अऊ केंद्र शासित प्रदेश मन ल सात लाख ले जादा वैक्सीन खुराक देहे जाही
दिल्ली, 11 मई 2021। महामारी के रोकथाम अऊ बचाव बर केंद्र सरकार ह जेन पंचकोणीय रणनीति बनाए हे, वोमे टीकाकरण के अहम हिस्सेदारी हे। ये पंचकोणीय रणनीति टेस्ट, ट्रैक, ट्रीट, कोविड आचरण अऊ टीकाकरण ये। केंद्र सरकार राज्य अऊ केंद्र शासित प्रदेश मन ल नि:शुल्क कोविड वैक्सीन प्रदान करके पूरा भारत म टीकाकरण अभियान म हाथ बंटावत हे।
कोविड-19 टीकाकरण के सरल अऊ तेज तीसर चरण के रणनीति म अमल करे जात हे। ये रणनीति एक मई, 2021 ले शुरू होए रहिस। रणनीति म ये साफ तौर म कहे गए हे के हर महीना केंद्रीय औषधि प्रयोगशाला ले मान्यता प्राप्त वैक्सीन मन म ले 50 प्रतिशत वैक्सीन ही केंद्र सरकार लेही। केंद्र सरकार सरलग केंद्रीय औषधि प्रयोगशाला ले मान्यता प्राप्त वैक्सीन मन के 50 प्रतिशत हिस्सा हर महीने मुहैया करत रइही। एखर अलावा राज्य सरकार मन ल ये वैक्सीन सरलग नि:शुल्क मिलत रइही, जइसे के पहिली घलोक देहे जात रहिस।
आज भिनसरहा आठ बजे तक मिले आंकड़ा के मुताबिक केंद्र सरकार ह राज्य अऊ केंद्र शासित प्रदेश मन ल अब तक 18 करोड़ वैक्सीन (18,00,03,160) ले जादा के खुराक नि:शुल्क मुहैया कराए हे। एमां ले बरबाद होवइया वैक्सीन मन ल मिलाके कुल 17,09,71,429 खुराक के खपत होए हे।
राज्य अऊ केंद्र शासित प्रदेश मन तीर अभी 90 लाख ले जादा (90,31,691) कोविड वैक्सीन के खुराक मौजूद हे, जेला अभी लगाए जाना हे। कुछ राज्य अइसन हे, जिहां वैक्सीन के हिसाब-किताब संतुलित नइ हे, काबर के उहां खपत (बरबाद होवइया वैक्सीन सहित) आपूर्ति ले जादा दिखाई देवत हे। एकर कारण ये हे के ए राज्य मन ह सशस्त्र बल मन के वैक्सीन ल अपन हिसाब म दर्ज नइ करे हें।
एखर अलावा, सात लाख (7,29,610) ले जादा वैक्सीन खुराक अगले तीन दिन म राज्य/केंद्र शासित प्रदेश मन ल मिलईया तको हे।
