अंधियारी ले अंजोरी कोति पूवर्ती गांव के अर्जुन के उड़ान

सुकमा, नक्सलवाद ले प्रभावित बस्तर अंचल के एक नाव जेन आज उम्मीद अऊ बदलाव के मिसाल बनके उभरे हे – वो हे माडवी अर्जुन। सुकमा जिला के अति-दुर्गम अऊ माओवादी हिंसा ले कइ बछर त्रस्त रहे पूवर्ती गांव के ए बालक ह जवाहर नवोदय विद्यालय, पेंटा (दोरनापाल) म छठवीं कक्षा म चयन पाके इतिहास रच देहे हे। ये केवल एक छात्र के जीत नइ हे, बल्कि ओ उम्मीद के संकेत हे जेन अब बस्तर के कोना-कोना म पीका फोरत हे।
माडवी अर्जुन जेन पूवर्ती गांव के रहइया ये, दरअसल वो नक्सली मन के कमांडर हिड़मा के पैतृक गांव ये। एक बेरा रहिस, जब पूवर्ती नक्सली मन के गढ़ माने जात रहिस। इहां माओवादी मन जन अदालत लगाके गांव वाले मन भाग्य के फैसला सुनात रहिन। अब उही पूवर्ती गांव, शिक्षा अऊ विकास के नवा सूरज के अंजोर बगरावत हे। अर्जुन के ए उपलब्धि ह ये देखा देहे हे के परिस्थिति कतकोन कठिन होवय, कहूं अवसर अऊ मार्गदर्शन मिलय त सफलता जरूर मिलथे।
अर्जुन अभी हाल म बालक आश्रम सिलगेर म पढ़ई करत रहिस। ओखर घर म नइ बिजली हे, न पक्की छत। ओखर माता-पिता खेती अऊ मजदूरी करके कोनो प्रकार ले घर चलाथे। तभो, अर्जुन ह कठिन परिस्थिति मन ल पीछू छोड़त अपन मेहनत अऊ आश्रम गुरूजी मन के समर्पण ले ये उपलब्धि अर्जित करे हे।
बीते डेढ़ बछर म छत्तीसगढ़ सरकार कोति ले चलाए जात नक्सल उन्मूलन अभियान ह बस्तर के दूरस्थ क्षेत्र मन म बदलाव के नींव रखे हे। पूवर्ती जइसे क्षेत्र जिहां पहिली सड़क, स्वास्थ्य, शिक्षा, बिजली जइसे मूलभूत सुविधा नइ रहिस, अब उहां सड़क निर्माण, सुरक्षा बल मन के कैंप, गुरुकुल विद्यालय, स्वास्थ्य सेवा अऊ उचित मूल्य दुकान शुरू हो गे हे।
पूवर्ती म अब लइका मन के पढ़ई बर सुरक्षा बल के देखरेख म चलत गुरुकुल ह एक प्रेरणादायी माहौल देना शुरू करे हे। अर्जुन के सफलता इही सरलग उदीम के पहली बड़का उपलब्धि हे।
जिला कलेक्टर श्री देवेश ध्रुव ह कहिस के पूवर्ती जइसे दुर्गम अऊ माओवाद प्रभावित गांव ले नवोदय विद्यालय म चयन, न केवल अर्जुन के मेहनत के परिणाम हे, बल्कि ये जिला के शिक्षा व्यवस्था म सकारात्मक बदलाव के घलोक संकेत हे। हम हर लइका ल आगू बढ़ाय के मौका देना चाहत हन।
मुख्यमंत्री श्री विष्णु देव साय ह कहिन के माडवी अर्जुन के सफलता छत्तीसगढ़ के बदलत तस्वीर के चिनहारी ये। ये ओ नवा-छत्तीसगढ़ के झलक हे, जेमां अंधियारी के जगा अब अंजोर के बात होवत हे। पूवर्ती जइसे गांव ले राष्ट्रीय स्तर के नवोदय स्कूल तक के सफर दर्शाथे के हमन जेन बीज शिक्षा, सुरक्षा अऊ विकास के बोए हन, वो अब फल देहे लगे हे। अर्जुन ल मोर कोति ले ढेरों बधाई अऊ शुभकामना। अब पूवर्ती क्षेत्र ले केवल एक अर्जुन न ही, हजारों अर्जुन निकलही अऊ छत्तीसगढ़ के भविष्य ल संवारहीं। राज्य सरकार हर लइका के सपना ल पंख देहे बर कटिबद्ध हे।
माडवी अर्जुन के ये यात्रा केवल एक छात्र के कहानी नइ हे, बल्कि ये ओ बदलाव के दास्तान हे, जेन ल बस्तर जीयत हे। नक्सलवाद के दीवार अब दरकत हे अऊ शिक्षा के अंजोर बस्तर के घर-अंगना म बगरत हे। बदलत बस्तर के ये शुरुआत हे। अब अर्जुन मन के लाइन लगही अऊ पूवर्ती जइसे गांव विकास के नवा कहिनी लिखबोन।