फूल के खेती करे ले किसान मन के होवत हे बढ़िया कमई
आधुनिक तकनीक ले फूल के खेती करे ब मिलत हे सरकार कती ले पईसा
रायपुर, नेहा राठौर के खबर/ शेडनेट पद्धति अइसे तकनीक आए जेकर ले साल भर फूल के खेती करे जा सकत हे। ए तरिका ले खेती करे म किसान मन ल साल भर सरलग कर सकथे कमई। छत्तीसगढ़ के किसान मन खाली फूल के खेती करे ब धियान नई देवत हे बलकी आधूनिक तरिका शेडनेट, पॉली हाऊस, ड्रिप अउ मल्चिंग के उपयोग घलो करत हे, ए सबके उपयोग कर के किसान मन ल अपन खेती ले उत्पादन घलो अबड़ बढ़िया मिलत हे। हैदराबाद, अमरावती, नागपुर अउ भुवनेश्वर जइसे बड़का शहर मन फूल के जादा मांग के सेती किसान मन अउ जादा आमदनी पावत हे।
फूल के खेती करे ब शेड नेट पद्धति ह अबड़ काम के तरिका आए,एकर से फसल ह कीरा अउ बीमारी ले बाचथे। जादा दिन तक फसल ह लगे रइथे तेकर सेती किसान मन ल दुगना फाएदा होवत हे।
अइसे फसल जेला गरमी के मउसम म नई लिए जा सके ओकर ब ए पद्धति ह अबड़ उपयोगी हे। एकर मदद ले साल भर फूल के खेती करे जा सकत हे। अउ उहें बरसात के मउसम म थरहा ह सुरक्षित घलो रईथे अउ नकसान नई होवय। राष्ट्रीय बागवानी मिशन के अनतरगत संरक्षित खेती करे ब 50 प्रतिशत अनुदान दिए जाथ हे। जेकर अनतरगत 710 प्रति वर्ग मीटर म 355 वर्ग मीटर म अनुदान के प्रावधान हर हावय। किसान ह जादा ले जादा 4000 वर्गमीटर म शेडनेट लगा सकत हे।
