कवर्धा, कबीरधाम जिला म पाछू 36 घंटा ले होवत सरलग बरसा ले जिला के कवर्धा, बोड़ला, सहसपुर लोहारा अऊ पंडरिया विकासखण्ड के वनांचल क्षेत्र मन संग नदी-नाला किनारे के गांव मन म बाढ़ के स्थिति बने हे। कलेक्टर श्री जनमेजय महोबे के निर्देश म जिला के सबो एसडीएम, तहसीलदार, पुलिस अऊ जिला सेनानी के जवान मन जिला म बाढ़ के स्थिति म सरलग मॉनिटरिंग करत हें अऊ जरूरत के मुताबिक राहतदल मन ह बाढ़ प्रभावित मन ल राहत पहुंचावत हें।
कलेक्टर श्री जनमेजय महोबे जिला म सरलग होवत बारिश के स्थिति ल देखे बर खुदे बाढ़ प्रभावित क्षेत्र मन म मोटर सायकल ले पहुंचत हें अऊ राहत काम के जायजा लेत हें। उमन बताइन कि जिला के प्रमुख नदी सकरी, आगर, अऊ फोक नदीं म बाढ़ के स्थिति बने हे। ए नदी के किनारे वाले सबो गांव मन अऊ आन बाढ़ प्रभावित क्षेत्र मन म जिला प्रशासन के टीम मुनादी करा के मनखे मन ल राहत शिविर अऊ प्रभावित मन के जान-पहचान वाले घर अऊ रिस्तेदार मन के घर जन सहायोग ले रूकवाए के काम करत हे। फोक अऊ आगर नदी के किनारे वाले गांव खैरवार अऊ सैइयामालगी के आसपास के बाढ़ क्षेत्र मन ले करीबन 40 मनखे मन ल प्रशासनिक अधिकारी अऊ जनसहयोग ले सुरक्षित निकाले गए हे अऊ राहत शिविर अऊ आन सुरक्षित जगा मन म रूकवाए के व्यवस्था बनाए गए हे।
