- बारूका पहुंचके दशगात्र कार्यक्रम म सामिल होइन
- मुख्यमंत्री ह शोक-संतप्त परिवार ल बंधाइन ढांढ़स
- विधानसभा अध्यक्ष अउ शासन के मंत्रीगण घलोक पहुंचिन
रायपुर, मुख्यमंत्री श्री भूपेश बघेल आज गरियाबंद जिला के ग्राम बारुका पहुंचके राज्य के सुप्रसिद्ध लोकगायक स्वर्गीय श्री मिथलेश साहू के दशगात्र कार्यक्रम म सामिल होइन अऊ ओ मन ल भावभीनी श्रद्धांजलि अर्पित करिन। मुख्यमंत्री श्री बघेल ह स्वर्गीय श्री साहू के परिवारजन ले मुलाकात करके अपन गहरी शोक-संवेदना प्रकट करिन। ये बेरा म उमन उंखर माता श्रीमती मनटोरा बाई, धर्मपत्नी श्रीमती आशालता, पुत्र श्री खुमन साहू अउ शोक-संतप्त परिवारजन ल ढांढस बंधाइन। श्री बघेल ह मंत्रीगण मन के संग श्रद्धांजलि अर्पित करत दिवंगत आत्मा के शांति बर ईश्वर ले प्रार्थना करिन। ये मौका म विधानसभा अध्यक्ष डॉ. चरणदास महंत, गृहमंत्री श्री ताम्रध्वज साहू, कृषि मंत्री रविन्द्र चौबे, अभनपुर विधायक श्री धनेंद्र साहू, गुंडरदेही विधायक श्री कुंवरसिंह निषाद अउर पूर्व सांसद श्री चंदूलाल साहू मौजूद रहिन।
