- ग्रामीण अर्थव्यवस्था ल गति देहे लॉक-डाउन के बीच मनरेगा के होवत हे संचालन
- जांजगीर म 46,423 गांव वाले मन ल स्थानीय स्तर म रोजगार, 1155 काम चालू
जांजगीर-चांपा, 18 अप्रैल 2020। राज्य अऊ केन्द्र शासन के दिशा-निर्देश के मुताबिक मनरेगा के काम मन म शारीरिक दूरी, मास्क अऊ स्वच्छता संबंधी दिशा-निर्देश मन के पालन ठउका करवाए जात हे। कोविड-19 के नियंत्रण बर देशव्यापी लॉक-डाउन के बीच ग्रामीण अर्थव्यवस्था ल मजबूती देहे बर प्रदेश म मनरेगा के काम मन के संचालन सरलग जारी हे। जांजगीर-चांपा जिला म ए काम मन म 46 हजार 423 गांव वाले मन ल रोजगार मिले हे। मनरेगा के अंतर्गत उहां के 347 ग्राम पंचायत मन म एक हजार 155 काम शुरू करे गए हे। लॉक-डाउन के समय श्रमिक मन ल तीन करोड़ 23 लाख रूपिया के मजदूरी भुगतान घलोक करे गए हे।
पंचायत अउ ग्रामीण विकास विभाग के स्थानीय अमला ह जांजगीर-चांपा जिला के सबो नौ विकासखंड मन म गांव वाले मन के मांग म मनरेगा के तहत काम उपलब्ध कराए जात हे। एखर माध्यम ले रोजगार के संगेच गांव मन म परिसंपत्ति मन के निर्माण घलोक होवत हे। मनरेगा म अभी सिंचाई विस्तार, जल संरक्षण अऊ जल संचय बर तालाब गहरीकरण, नहर अउ बांध मन के निर्माण, मरम्मत अऊ तटबंध के काम करे जात हे। चालू वित्तीय साल म मनरेगा श्रमिक मन ल रोजेच 190 रूपिया के मजदूरी देहे जात हे।
