रायपुर, खाद्य पदार्थ, आयुर्वेदिक उत्पाद, पर्सनल केयर संग दैनिक उपयोग के आन वस्तु मन के प्रयोगशाला परीक्षण (टेस्टिंग) के सुविधा जल्दीच अब छत्तीसगढ़ म होही। एखर खातिर इंदिरा गांधी कृषि विश्वविद्यालय के कृषि विज्ञान केन्द्र, खाद्य विभाग के कालीबाड़ी स्थित परीक्षण-प्रयोगशाला अऊ आयुर्वेदिक कॉलेज रायपुर के ड्रग टेस्टिंग प्रयोगशाला अऊ अनुसंधान केन्द्र म अंतर्राष्ट्रीय स्तर के सबो जरूरी सुविधा उपलब्ध कराए जाही। ए प्रयोगशाला मन के संग सर्टिफिकेशन के काम घलोक करे जाही।
मुख्य सचिव श्री अमिताभ जैन ह वीडियो कॉन्फ्रेंसिंग के संग ये संबंध म बैठक लीन अऊ अधिकारी मन ल जरूरी कार्यवाही जल्दी चालू करे के हुकुम दीन। उमन कहिन कि कृषि विश्वविद्यालय, कालीबाड़ी अऊ आयुर्वेदिक कॉलेज म पहिली ले स्थापित परीक्षण प्रयोगशाला मन म जल्दी से जल्दी दैनिक उपयोग के चीज मन के गुणवत्ता बर सबो प्रकार के जांच प्रक्रिया चालू करे जाय। अइसनहे नवा रायपुर म बने उन्नत तकनीक प्रयोगशाला के निर्माण घलोक जल्दी से जल्दी पूरा कर ले जाय। छत्तीसगढ़ म जल्दीच एथेनाल के उत्पादन ल देखत एखर गुणवत्ता के जांच बर बायो एथेनाल-बायो डीजल प्रयोगशाला के स्थापना बर जरूरी प्रक्रिया शुरू कर देहे जाय। उमन अधिकारी मन के संग पीपीपी मोड म प्रयोगशाला के स्थापना के संभावना मन उपर घलोक विचार-विमर्श करिन। उमन कहिन कि जऊन चीज मन के जांच ए प्रयोगशाला मन म करना सम्भव नइ हे वोखर बर अलग-अलग चीज मन के परीक्षण अऊ टेस्टिंग बर अलग-अलग प्रयोगशाला मन के संबंध म कार्ययोजना बनाय जाय, जेखर से प्रयोगशाला मन म एके प्रकार के जांच के दुहराव झन होवय।
खाद्य-आयुर्वेदिक-पर्सनल केयर अऊ आन जरूरी वस्तु मन के टेस्टिंग अब जल्दीच छत्तीसगढ़ म होही
