खाद्य मंत्री श्री अमरजीत भगत ह मोबाइल वैन के माध्यम ले लीन जनसभा
रायपुर 16 सितम्बर 2020। खाद्य अऊ संस्कृति मंत्री श्री अमरजीत भगत ह आज रायपुर स्थित अपन कार्यालय ले मोबाइल वैन के माध्यम ले सरगुजा जिला के कई ठन गांव मन के मनखे मन ले बात-चीत करिन अऊ ऊंखर समस्या मन के निराकरण घलोक करिन। श्री भगत ह सरगुजा जिला के बतौली, घोघरा, सलियाडीह, तिरंग, बांसाझाल आदि गांव मन के मनखे मन ले बात-चीत करिन।
मंत्री श्री भगत ह सीतापुर विधानसभा क्षेत्र के बतौली ग्राम पंचायत के जनता ले बात करिन। गांव वाले मन ह बताइन के बतौली ग्राम पंचायत के मुख्य मार्ग बन जाय ले जनता बहुत खुश हें। उमन मंत्री अमरजीत भगत ल धन्यवाद दीन। श्री भगत ह स्थानीय निवासी मन कोति ले कोविड चिकित्सा केंद्र म बिस्तर के संख्या बढ़ाए के मांग उपर तुरंते जिला कलेक्टर सरगुजा ले फोन म बात करिन अऊ ओ मन ल बिस्तर के संख्या ल 4 ले बढ़ाके 10 करे के निर्देश दीन। इहां के जनता ह श्री भगत ल बताइन के हैंडपम्प लग जाय ले काफी हद तक पानी के समस्या दूर हो गए हे। एखर बर गांव वाले मन ह मंत्री भगत के प्रति आभार प्रकट करिन। संगेच गांव वाले मन ह बताइन के अमृत जल योजना के तहत घर-घर पानी के पाइप लाइन लगाय के काम शुरू हो गए हे। बतौली के गांव वाले मन ह सामुदायिक भवन के नवीनीकरण के मांग करिन। येकर उपर घलोक जल्दी निर्णय लेत मंत्री भगत ह मुख्य कार्यपालन अधिकारी ले बात करिन अऊ उहां के काम बर अनुमोदित राशि जारी करे के निर्देश दीन।
मंत्री श्री भगत ह सीतापुर विधानसभा के ग्राम पंचायत घोघरा म पी.डी.एस भवन निर्माण के घोषणा करिन। संगेच गोठान, मिडिल स्कूल पहुंच मार्ग म सीसी रोड निर्माण अऊ गहगहि झरिया म पुलिया निर्माण के स्वीकृति दीन। उमन उचित मूल्य के दुकान मन म मिलइया राशन के गुणवत्ता के बारे म ग्रामवासी मन अऊ हितग्राही मन ले जानकारी लीन। हितग्राही मन ह ये संबंध म संतुष्टि जताईन। अइसनहे ग्राम पंचायत सलियाडीह म मोबाइल जनसभा के समय मंत्री अमरजीत भगत ह गौठान बनवाए के घोषणा करिन अऊ सीईओ ल काम जल्दी पूरा करवाए के निर्देश दीन। एखर अलावा उमन इहां पंचायत भवन के नवीनीकरण, साकेन नदी म पुलिया निर्माण, वनाधिकार पट्टा के वितरण संबंधी जानकारी लीन अऊ लंबित पट्टा मन ल जल्दी जारी करे के निर्देश दीन। उमन सलियाडीह ले कछारडीह मार्ग म सीसी सड़क निर्माण काम शुरू करे के निर्देश दीन। मनखे मन ले बातचीत के समय मंत्री भगत ह बिजली-पानी के बारे म जानकारी लीन। जिहां पानी के समस्या हे, उहां उमन हैंडपम्प लगाय के निर्देश दीन। उमन जर्जर हो गए पंचायत भवन के नवीनीकरण बर ग्राम पंचायत सी.ई.ओ ल जरूरी निर्देश दीन। अइसनहे मोबाइल जनसभा ग्राम पंचायत बांसाझाल अऊ ग्राम पंचायत तिरंग म घलोक होइस।
