रायपुर, 07 अपरेल 2020। खाद्य मंत्री श्री अमरजीत भगत ह आज राजधानी रायपुर अऊ अभनपुर स्थित 5 उचित मूल्य के दुकान मन के उदुपहा जांच करिन। ये बेरा म खाद्य विभाग के सचिव डॉ. कमलप्रीत सिंह, संग आन अधिकारी मौजूद रहिन। श्री भगत ह सबो राशन दुकान मन म खाद्यान्न लेहे आए हितग्राही मन ले बात-चीत करिन अऊ खाद्यान्न वितरण के संबंध म जानकारी लीन। उमन राशन दुकान मन म उपलब्ध चावल, नमक अऊ शक्कर के गुणवत्ता के घलोक जांच करिन। उमन अधिकारी मन ल खाद्यान्न सामान के गुणवत्ता म विशेष ध्यान रखे के हुकुम दीन। श्री भगत ह दुकान संचालक मन ल कोरोना वायरस के संक्रमण ले सुरक्षा बर करे जात उपाय ल अमल म लाय के घलोक हुकुम दीन।
जानबा हे के राज्य शासन कोति ले कोरोना वायरस के संक्रमण के रोकथाम बर करे गए लॉकडाउन के बेरा म राज्य के सबो गरीब परिवार ल दू महिना अप्रेल अऊ मई के चावल, नमक अऊ शक्कर एक मुश्त देहे जात हे। प्रदेश के 36 लाख 48 हजार 605 राशनकार्ड परिवार मन ल खाद्यान्न के वितरण करे गए हे।
