रागी के दिन बहुरत हे: सुपोषण बर रागी ले बने खाद्य पदार्थ महत्वपूर्ण

रायगढ़, कई पीढ़ी ले रागी आदिवासी इलाका मन म रहइया मनखे मन के एक प्रमुख खाद्यान्न होत रहिस। फेर समय के संग एखर उपभोग म कमी आए लगिस, फेर आज शासन-प्रशासन के योजना ले रागी के खेती ल पुनर्जीवन मिलत हे। राज्य शासन कोति ले राजीव गांधी किसान न्याय योजना के अंतर्गत आन फसल मन ल प्रोत्साहन देहे के दिशा म काम करे जात हे। जेखर से रागी के रकबा बाढ़त हे। रायगढ़ म घलोक रागी के रकबा म विस्तार होय हे। जिला के लैलूगा, धरमजयगढ़, घरघोड़ा, तमनार अऊ खरसिया जइसन आदिवासी बाहुल्य क्षेत्र मन म कई पीढि ले रागी के खेती होत रहे हे। फेर बजार म एकर उचित मांग अऊ मूल्य नइ होए ले एकर रकबा सीमित हो गए रहिस।
आज शासन-प्रशासन ले मिले प्रोत्साहन ले जिला म खरीफ 2021-22 म करीबन 1680 हेक्टेयर म रागी के फसल लेहे जात हे। जेमां ले एक तिहाई ले जादा रकबा सिरिफ लैलूंगा विकासखण्ड म हे। इहां पाछू खरीफ साल म रागी के पैदावार नगण्य रहिस। उहें ये खरीफ साल म लैलूंगा म किसान मन 609 हेक्टेयर म रागी के फसल लेवत हे। एखर से लैलूंगा ल आज रागी विकासखण्ड के एक नवा पहिचान मिलत हे।
पौष्टिक अऊ खुबि मन ले भरे रागी सुपोषण के दृष्टि ले काफी महत्वपूर्ण हे। प्रदेश रागी के फसल ल प्रोत्साहन देहे के संग आंगनबाड़ी केन्द्र मन के माध्यम ले रागी ल लइका मन के खुराक म सामिल करे गए हे। रागी के उत्पादन ल बढ़ावा देहे रायगढ़ जिला म 2020-21 म 590 हेक्टेयर के लक्ष्य प्रस्तावित कर शत-प्रतिशत पूर्ति करे गए हे। खरीफ साल 2021 म रकबा म विस्तार करत जिला म कुल 1680 हेक्टेयर क्षेत्र म किसान मन ले रागी के फसल उत्पादन प्रस्तावित हे। जिला के विकासखंड लैलूंगा म रबी साल 2020-21 म 57 हेक्टेयर क्षेत्र म किसान मन ह रागी के फसल लेहे रहिन। जेखर से किसान मन ल 27 क्विंटल प्रति हेक्टेयर रागी फसल के उत्पादन मिले रहिस। खरीफ साल 2021 म 609 हेक्टयर म किसान मन ह रागी के फसल लेहे हे। कलेक्टर श्री सिंह ह जिला म किसान मन ल फसल प्रोत्साहन बर समर्थन मूल्य के अकतहा प्रति क्विंटल 1100 रूपिया जादा म क्रय करे के व्यवस्था करे हे। एखर बर कृषि विभाग कोति ले किसान मन ले रागी के फसल सीधा आंगनबाड़ी केन्द्र मन बर उपलब्‍ध कराए जात हे। जिला म खरीफ साल 2021-22 म डीएमएफ मद ले 1680 हेक्टयर क्षेत्र बर 200 क्विंटल रागी बीज के भंडारण करवाए गए हे। फसल के समर्थन मूल्य ले जादा राशि मे क्रय करे ले खरीफ साल 2021-22 म किसान मन नगद रागी बीज क्रय करके फसल लेहे बर उत्साहित हें। समर्थन मूल्य ले 1100 रूपिया प्रति कुंटल ले जादा 4500 रूपिया प्रति क्विंटल म जिला ले कुल 39 कुंटल रागी 01 लाख 75 हजार रूपिया मूल्य के महिला बाल विकास रायगढ़ ल विक्रय करे गए हे। रागी ले लड्डू बनाए के जिला के एसएचजी के सदस्य मन ल उड़ीसा के एक्सपर्ट टीम ले प्रशिक्षित करे गए हे। शेष उत्पादित रागी ल किसान मन कोति ले खुदे 50-55 रूपिया प्रति किलो के हिसाब ले बाहरी व्यापारी मन ल बेचे गए हे। बाजार म बनेच मांग होए ले किसान मन ल रागी के अच्छा मूल्य मिलत हे। जेखर से उमन ल आर्थिक लाभ होवत हे अऊ जिला के किसान उत्साहित हें।