वन विकास निगम अउ एनएमडीसी बचेली के बीच 50 हजार पौधा लगाय के अनुबंध
दंतेवाड़ा, पर्यावरण ला बचाए अउ हरियाली बढ़ाए के मुख्य उद्देश्य ह मौसम बदलाव के असर ला कम करना, कार्बन उत्सर्जन ला घटाना अउ जीव-जंतु मन के विविधता ला सुरक्षित रखना आय। एखर माध्यम ले हवा के सुद्धता ला सुधारना, माटी के कटाव ला रोकना, ऑक्सीजन के स्तर ला बढ़ाना अउ बढ़िया विकास ले आऊइया पीढ़ी बर एक साफ अउ संतुलित पर्यावरण पक्का करना हे। पर्यावरण के सुरक्षा अउ हरियाली बढ़ाए के उद्देश्य ले वन विकास निगम अउ एनएमडीसी बचेली के बीच बीते 13 जनवरी के 50 हजार पौधा लगाए बर समझौता होय हे।
ए पहल के उद्देश्य इलाका मा हरियाली बढ़ाना, पर्यावरण के संतुलन ला मजबूत करना अउ स्थानीय जैव विविधता ला बचाना हे। वन विकास निगम ह बछर 2005 ले एनएमडीसी के अलग-अलग इलाका मन मा सरलग पौधारोपण के काम करत हे। अब तक निगम कोति ले कुल 15 लाख 37 हजार पौधा लगाय गे हे, जेकर ले पर्यावरण सुरक्षा ला मजबूती मिले हे अउ इलाका मा हरियाली के विस्तार होय हे।
ए पौधारोपण के काम ह पारी-पारी करे जाही। एमा इहाँ के स्थानीय प्रजाति के पौधा मन ला पहिली जगा दे जाही अउ पौधा मन के देखरेख अउ सुरक्षा बर जरूरी इंतजाम करे जाही, ताकि लगाय गे पौधा मन बने सहिन बढ़ सकंय।
जानबा हे के ए अभियान बर वन मंत्री श्री केदार कश्यप ह वन विकास निगम के बड़ाई करीन। ओमन के मानना हे के ए अभियान ले स्थानीय मनखे मन बर रोजगार के मऊका घलो मिलही। पौधा लगाए, ओकर देखरेख अउ सुरक्षा के काम मा स्थानीय मजूर मन के भागीदारी ले गाँव वाले मन के आय मा बढ़ोत्तरी होय के भरोसा हे। एनएमडीसी बचेली कोति ले ए पहल कंपनी के सामाजिक जिम्मेदारी (CSR) के तहत करे जात हे, जेहा पर्यावरण बचाए के संगे-संग स्थानीय विकास अउ रोजी-रोटी ला मजबूत करे के रद्दा मा एक बड़का कदम आय।
