रायपुर, वन, परिवहन, घर अउर पर्यावरण, विधि विधायी मंत्री श्री मोहम्मद अकबर आज कबीरधाम जिला के अंतर्गत नगर पंचायत पिपरिया अऊ नगर पालिका कवर्धा के अध्यक्ष अऊ उपाध्यक्ष के पदभार ग्रहण कार्यक्रम म सामिल होइन। नगर पंचायत पिपरिया म नव निर्वाचित अध्यक्ष श्री महेन्द्र कुम्भकार, उपाध्यक्ष श्री शत्रुघन साहू ह पदभार ग्रहण करिस। एखर बाद कवर्धा के नगरपालिका परिषद म घलोक नवनिर्वाचित नगरपालिका अध्यक्ष श्री ऋषि शर्मा अऊ उपाध्यक्ष श्री जमील भाई ह पदभार संभालिन। ये कार्यक्रम के बाद मंत्री श्री अकबर पांडातराई, बोड़ला अउर सहसपुर लोहारा नगर पंचायत के नवनिर्वाचित अध्यक्ष, उपाध्यक्ष अउर सबो पार्षद मन के आयोजित पदभार ग्रहण समारोह म सामिल होइन।
वन मंत्री श्री मोहम्मद अकबर ह पिपरिया अउर कवर्धा म आयोजित कार्यक्रम म नवनिर्वाचित अध्यक्ष अऊ पार्षद मन ल शुभकामना अउर बधाई दीन। उमन कहिन कि प्रदेश सरकार के वादा के मुताबिक किसान मन के करजा माफ होय हे। संगेच धान लिमिट के समस्या बर अवइया बेरा म मंत्रीमंडल कोति ले फैसला लेहे जाही, जऊन किसान मन के हित म ही होही। आन कोनो समस्या आए म किसान अपन पंजीयन नंबर 112 म शिकायत दर्ज करा सकत हें। ऊंखर शिकायत उपर 72 घंटा के भीतर निराकरण करे के कार्यवाही करे जोही। उमन कहिन कि पउर साल 16 लाख किसान मन ल ह पंजीयन कराए रहिन, फेर ये साल 30 लाख किसान मन के पंजीयन होय हे। उमन कहिन कि किसान मन के धान ल सरकार अपन आय ले खरीदथे, चाहे बैंक ले लोन लेके या आन योजना ले। उमन आगू कहिन कि कोनो राशन कार्ड ले वंचित झन रहय ये सेती सर्वे कराके जनता ल राशन कार्ड उपलब्ध करावत हन। एखर अलावा कोनो छूट गए होही त आवेदन देके पात्र हितग्राही मन ल राशन कार्ड वितरण करे जाही। शासन के योजना के लाभ हर एक जनता ल मिलय ये सरकार के प्राथमिकता म हे।
ये बेरा म नव निर्वाचित नगर पालिका अध्यक्ष श्री ऋषि शर्मा ह कहिन कि कवर्धा के जनता ह जऊन विकास के सपना देखे हें, ओ ल साकार करना हे। संगेच जनता के छोटे-बड़े समस्या जइसे प्रमाण पत्र म हस्ताक्षर करे बर चक्कर लगाय के जरूरत नइ होही। रोजेच कार्यालय म उपस्थित होके पूरा ईमानदारी ले काम करे के प्राथमिकता होही। ये बेरा म सबो नवनिर्वाचित अध्यक्ष, उपाध्यक्ष, पार्षदगण सर्व श्री प्रवीण वैष्णव, राधे लाल, भास्कर, कलेक्टर श्री अवनीश कुमार शरण, पुलिस अधीक्षक डॉ. लाल उमेंद सिंह, वनमंडलाधिकारी श्री दिलराज प्रभाकर, जिला पंचायत सीईओ श्री विजय दयाराम के., एडीएम श्री विपुल गुप्ता, नगर पालिका के सीएमओ संग नगर के वरिष्ठ नागरिकगण उपस्थित रहिन।
