वन मंत्री श्री अकबर ह नदी तट वृक्षारोपण कार्यक्रम के सफल क्रियान्वयन बर दीन निर्देश
रायपुर, 13 जुलाई 2020। प्रदेश म वन विभाग कोति ले नदी तट वृक्षारोपण कार्यक्रम के तहत 14 नदिया मन के पार म 10 लाख 40 हजार पौधा के रोपण के काम जोर म हे। एखर तहत चालू साल म नदी तट के 946 हेक्टेयर रकबा म पौधा मन के रोपण करे जात हे।
वन मंत्री श्री मोहम्मद अकबर ह एखर सफल क्रियान्वयन बर प्रधान मुख्य वन संरक्षक श्री राकेश चतुर्वेदी ल जरूरी निर्देश देहे हें। एखर तहत महानदी, कोटरी नदी, मेढ़की नदी, भापरा नदी, अरपा नदी, मनियारी नदी, आगर नदी, सकरी नदी, इंद्रावती नदी, नारंगी नदी, पैरी नदी, खारून नदी, रेहर नदी अऊ अटेम नदी के पार मन म वृक्षारोपण करे जात हे। नदी तट वृक्षारोपण कार्यक्रम के तहत रोपित होवइया पौधा मन म पीपल, आम, आंवला, अर्जुन, बांस, शिशु, कहुआ, जामुन, नीम, करंज, महुआ, सीरस, अकेशिया अऊ आन मिश्रित प्रजाति के पौधा ल सामिल करे गए हे।
