बांस करील के अवैध परिवहन म कार्रवाई आरोपी गिरफ्तार

बलौदाबाजार, प्रदेश म बांस करील अऊ पिका के अवैध परिवहन के मामला म लउहे अऊ प्रभावी कार्रवाई करे जात हे। इही कड़ी म गिरौदपुरी, रहवइया प्रवीण कुमार पटेल के विरूद्ध बांस करील अऊ पिका के अवैध परिवहन उपर कार्यवाही करके आरोपी ल गिरफ्तार करे गीस।
मिले जानकारी के मुताबिक बलौदाबाजार-भाटापारा जिला के वन परिक्षेत्र अधिकारी श्री रूपेन्द्र कुमार साहू के अगुवई म महराजी सर्कल के वन कर्मचारी अऊ सुरक्षा श्रमिक मन कोति ले करे गए नियमित गश्त के समय प्रवीण कुमार पटेल पिता भनेश राम पटेल, उम्र 37 साल, रहवइया ग्राम गिरौदपुरी, ल मोटरसाइकिल (होंडा साइन, नंबर CG22 AF 8094)  म बांस करील अऊ बांस पिका के अवैध रूप ले परिवहन करत रंगे हाथ पकड़े गीस। मौका म ही वाहन अऊ बांस करील अऊ पिका ल जप्त करके पी.ओ. आर. दर्ज करे गीस। बरामद नासवान बांस करील अऊ पिका ल नियमानुसार गड्ढा खोदके नष्ट करे गीस। संगे संबंधित के विरूद्ध विभागीय कार्यवाही करे जात हे।
वनमण्डलाधिकारी  धम्मशील गणवीर ह कहिन हे के वन संपदा के अवैध कटाई अऊ परिवहन पर्यावरण अऊ जंगल के स्वास्थ्य बर गंभीर खतरा हे। वन विभाग सरलग जंगल अऊ वन उत्पाद मन के अवैध कटाई अऊ परिवहन म नज़र रखे हे अऊ अइसन मामला मन म जल्दी कार्रवाई करके वन संपदा के सुरक्षा बर प्रतिबद्ध हे। आम जनता अऊ गांव वाले मन ले अपील करे गए हे के कोनो अवैध गतिविधि मनके सूचना तुरंत विभाग ल देवव, ताकि सामूहिक प्रयास ले वन के रक्षा करे जा सकय अऊ अवैध गतिविधि मन म लिप्त मनखे मन के विरूद्ध कार्यवाही करे जा सकय।