रायपुर, 16 अक्टूबर 2020। राज्य शासन ह कुपोषण मुक्त छत्तीसगढ़ बनाए बर फोर्टिफाईड चावल वितरण योजना शुरू करे के निर्णय लेहे हे। मुख्यमंत्री श्री भूपेश बघेल ह साल 2020-21 के अपन बजट भाषण म ये योजना ल चालू करे के घोषणा करे रहिन। एखर खातिर राज्य सरकार ह 5 करोड़ 80 लाख रूपिया के बजट प्रावधान घलोक करे हे। योजना के शुरूआत एक नवम्बर 2020 ले करे जाही। ये योजना म आदिवासी जिला कोण्डागांव के पायलट प्रोजेक्ट के तहत चयन करे गए हे। फोर्टिफाईड चावल के वितरण सार्वजनिक वितरण प्रणाली के तहत उचित मूल्य के दुकानों ले करे जाही।
खाद्य विभाग के सचिव डॉ.कमलप्रीत सिंह के बताती राज्य म कुपोषण अऊ एनीमिया ल दूर करे बर महत्वाकांक्षी फोर्टिफाईड चावल वितरण योजना शुरू करे जात हे। फोर्टिफाईड चावल म आयरन, फॉलिक एसिड अऊ विटामिन बी12 होए के सेती ये शरीर म खून के कमी, भ्रूण विकास, खून निर्माण अऊ नर्वस सिसटम के सामान्य कामकाज म सहायक होथे। ये योजना कुपोषण अऊ एनिमिया ल दूर करे म महत्वपूर्ण साबित होही।
जानबा हे के राज्य के बस्तर संभाग के निवासी मन म आयरन के कमी ल दूर करे बर सार्वजनिक वितरण प्रणाली के तहत गुड़ के वितरण करे जात हे। बस्तर संभाग के 6 लाख 71 हजार अंत्योदय, प्राथमिकता, अन्नपूर्णा, एकल निराश्रित अऊ निःशक्तजन राशनकार्डधारी मन ल हर महीना 17 रूपिया प्रतिकिलो के दर म 2 किलो गुड़ देहे जात हे। ये योजना के शुरूआत जनवरी 2020 ले करे गए हे। एखर अलावा राज्य म कुपोषण अऊ एनीमिया मुक्ति बर मुख्यमंत्री सुपोषण योजना शुरू करे गए हे। एखर तहत छै साल तक के कुपोषित लइका मन अऊ 15 ले 49 साल तक के महिला मन ल गरम जेवन अऊ पौष्टिक आहार देहे जात हे। राज्य शासन ह से योजना के शुरूआत 2 अक्टूबर 2019 ले शुरू करे रहिस।