भखारा, लवन, सकरी अउ राजकिशोर नगर म उप पंजीयक कार्यालय मन ला मिलिस प्रशासकीय स्वीकृति
रायपुर, प्रदेश म आम जनता ला रजिस्ट्री अउ पंजीयन ले जुड़े सुविधा मन ला आसानी ले, सुलभ अउ सही बखत म पहुँचाए बर राज्य सरकार ह एक बड़का फैसला लेहे हे। रजिस्ट्रीकरण अधिनियम-1908 के तहत भखारा (जिला धमतरी), लवन (तहसील मुख्यालय, जिला बलौदाबाजार-भाटापारा), सकरी अउ राजकिशोर नगर (बिलासपुर) म चार ठन नवा उप पंजीयक कार्यालय (Sub-Registrar Offices) खोले बर प्रशासकीय मंजूरी देहे गे हे।
मिले जानकारी के मुताबिक, धमतरी जिला के भखारा म नवा उप पंजीयक कार्यालय खोले बर मंजूरी मिल गे हे। वइसनहे बलौदाबाजार-भाटापारा जिला के तहसील मुख्यालय लवन अउ बिलासपुर जिला के राजकिशोर नगर अउ सकरी म घलो उप पंजीयक कार्यालय खोले के स्वीकृति देहे गे हे।
ए नवा कार्यालय मन के खुले ले उहाँ के रहइया मन ला रजिस्ट्री के काम बर दूरिहा जिला मुख्यालय तक जाय के जरूरत नइ परही। एकर ले बखत अउ पइसा के बचत होही, भीड़ कम होही अउ पंजीयन के काम ह अउ जादा साफ-सुथरा अउ आसान बनही। संगे-संग स्थानीय स्तर म आर्थिक काम-काज ला बढ़ावा मिलही अउ सरकारी काम म तेजी घलो आही।
मुख्यमंत्री श्री विष्णु देव साय ह कहिन के राज्य सरकार के लकस हे के सासन के सुविधा मन आम जनता ला ओखर मेर (नजदीक) ही मिलय। नवा उप पंजीयक कार्यालय मन के मंजूरी ले मनखे मन ला रजिस्ट्री के काम म बड़े राहत मिलही। ए फैसला ह सुसासन के डहर म एक अउ मजबूत कदम हे, जेकर ले जनता के बखत बाचही अउ सरकारी काम-काज म पारदर्शिता आही।
वित्त अउ वाणिज्य कर पंजीयन मंत्री श्री ओ.पी. चौधरी ह कहिन के हमर सरकार ह जनता के सुविधा ला सबले पहिली रखत हे। चार नवा कार्यालय मन के मंजूरी एही सोच के फल हे। एखर ले पंजीयन के बेवस्था मजबूत होही अउ मनखे मन ला ओखर क्षेत्र म ही बढ़िया सुविधा मिल सकही। ओ मन बताइन के पंजीयन विभाग कोति ले 10 नवा क्रांतिकारी सुधार लागू करे हे, जेकर फायदा ए क्षेत्र के मनखे मन ला घलो मिलही।
एमा ऑटो डीड जनरेशन, आधार आधारित बायोमेट्रिक सत्यापन, घर बैठे रजिस्ट्री, अपन-आप नामांतरण (Mutation), ऑनलाइन भारमुक्त प्रमाणपत्र (Encumbrance Certificate), ऑनलाइन पइसा जमा करे के सुविधा, व्हाट्सएप सेवा, डिजीलॉकर एकीकरण, डिजी-डॉक सेवा अउ खसरा नंबर ले ऑनलाइन रजिस्ट्री डाउनलोड करे के सुविधा सामिल हे।
