उभरत संभावना मन के जादा ले जादा उपयोग करके स्वरोजगार कोति बढ़यं युवा : वित्त मंत्री श्री ओपी चौधरी

रायपुर, 02 मार्च 2024। छत्तीसगढ़ के वित्त मंत्री श्री ओपी चौधरी ह आज इंदिरा गांधी कृषि विश्वविद्यालय म नाबार्ड कोति ले आयोजित तीन दिन के एफपीओ मेला के फीता काटके शुभारंभ करिन। ए बेरा म धरसींवा विधायक श्री अनुज शर्मा, लुंड्रा विधायक श्री प्रबोध मिंज, कृषि विश्वविद्यालय के कुलपति श्री गिरीश चंदेल अउ नाबार्ड के मुख्य महाप्रबंधक श्री ज्ञानेन्द्र मणि घलोक उपस्थित रहिन। ए मेला म प्रदेश भर के किसान अपन उत्पाद के विक्रय अउ विपणन ले संबंधित जानकारी हासिल कर सकहीं अऊ नवा तकनीक के जानकारी हासिल करके अपन उत्पाद म वैल्यू एडिशन करके अउ नवा एफपीओ बनाके अपन वित्तीय स्थिति मजबूत करे के दिशा म आगू बढ़हीं।
एफपीओ अर्थात किसान उत्पादक संगठन छोटे जोत आधारित कृषि ल एक व्यवहारिक कृषि-व्यवसाय म बदले अऊ विशेष रूप ले छोटे अऊ सीमांत किसान मन के शुद्ध आय बढ़ाए बर एक प्रभावी तंत्र के रूप म उभरत हे। छत्तीसगढ़ म खाद्य उत्पादन के क्षेत्र म 57 एफपीओ खाद्यान्न, फल, सब्जि अऊ मसाला मन के उत्पादन जइसे कई गतिविधि मन म लगे हें। ए एफपीओ के संख्या अऊ बढ़ाए जा सकय अउ एकर जरिए राज्य भर के किसान कृषि ल फायदेमंद व्यवसाय बना सकयं, ते पाए के नाबार्ड ह इंदिरा गांधी कृषि विश्वविद्यालय म तीन दिवसीय एफपीओ मेला के आयोजन करत हे। ये मां राज्य भर के 46 एफपीओ अपन उत्पाद के संग भाग लेवत हें।