कोरिया, 20 जून 2021। मुख्यमंत्री भूपेश बघेल जब वर्चुअल कार्यक्रम म कोरिया जिला के विकास काम के शिलान्यास अऊ लोकार्पण कार्यक्रम के समय योजना मन के हितग्राही मन ले चर्चा करत रहिन ये दौरान जिला म किसान उत्पादक संगठन कोरिया के संचालक श्री फय्याज आलम ले घलोक उंखर चर्चा होइस।
श्री आलम ह मुख्यमंत्री श्री बघेल ल बताइस कि ऊंखर खाद्य उत्पादन संगठन ले 573 किसान जुड़े हें, जेमें 72 प्रतिशत किसान आदिवासी समुदाय ले हें। वो ह मुख्यमंत्री के आभार व्यक्त करत बताइस कि मुख्यमंत्री जी के सहायता ले संगठन ल डिस्टिलेशन, दाल मिल, राइस मिल, ऑयल मिल, अऊ दूध प्रसंस्करण जइसे इकाई प्राप्त होए हे। ओ मन अपन उत्पाद ल खादी इंडिया, ट्राइब्स इंडिया, खादी ग्रामोद्योग, हस्तशिल्प बोर्ड अऊ फ्लिपकार्ट जइसे प्लेटफार्म्स के माध्यम ले जन-जन तक पहुंचावत हें। संगेच सामूहिक बाड़ी ले निकलइया हल्दी, लेमनग्रास, शकरकंद के विक्रय कृषि विज्ञान केंद्र के माध्यम ले करत हें। श्री आलम ह मुख्यमंत्री ल बताइस कि अब ऊंखर संगठन के लक्ष्य 1.5 करोड़ ले 2 करोड़ रूपिया के टर्नओवर हासिल करना हे ताकि संगठन ले जुड़े हर एक किसान आर्थिक रूप ले सशक्त होवय। श्री आलम ह मुख्यमंत्री श्री बघेल ल उंखर कृषक कल्याणकारी योजना मन बर आभार व्यक्त करिन।
एफपीओ के माध्यम ले किसान उत्पादक संगठन ल मिलीस 41 लाख रूपिया के टर्नओवर
